شامة درگوم من ال"قوة الناعمة" الى "القصر" هادي القصة ديال "شامة العوامة". من معلمة للاخوان والقاعدة والامارات واسرائيل. كيفاش حصلات على معطيات حساسة على الصحافيين وباعتها واش علاقتها ب"لادجيد" وبالكولونيل فالقصر وشكون كلفها دافع على بلادنا فتل ابيب

هاد ليام واحد السيدة لقاتها سايبة. ولات كتعطي رأيها فكلشي. كتحتال على شي وحدين وكتقدم راسها مرة صحافية مرة خبيرة فالاعلام مرة فالاذاعة مرة فالاعلام الرقمي مرة فاسرائيل واخرى فالاخوان المسلمين. هادي اسمها شامة درشول اللي غنسميوها شامة درگوم. يعني غير اجي يا فم وكول.
هاد البنت اللي تخلقات خبيرة فكلشي. دابا هي ولات تقدم راسها كتحرك ك"قوى ناعمة". هاد الشي بنات جزء منو على معلومة شي كيكذبها وشي كيقول كاينة ولكن ماشي كيف كتقدمها. هي كتقول باللي خوها "كولونيل على سلامة المعاملات المالية في الديوان الملكي". دابا هنا المشكل لكبير.
الديوان الملكي والجيش
ايلى لخبار بصاح كارثة حقاش كتوظف الديوان الملكي والجيش فامور حتى حد ما قدر يفهم خيوطها. مشبكة. ايلى كان كذوب كارثة كبر. الادعاء والنصب والاحتيال. علاش؟ هي كتبات فشي تدوينة اخيرة ليها كترد على شي مقال ف"القدس العربي" باللي هي تحركات فاسرائيل "هذا لا يمنع أني "تحركت" مرارا ك Soft power agent لصالح المغرب في اسرائيل منذ 2017، مرورا ب"كشف" قضية الطائرة الاماراتية واجلاء الاسرائيليين من المغرب"وانها تحركت "لصالح المغرب في اسرائيل" وعدد من الدول. كنعرفو بلادنا. اذن هادي محمد السادس اللي راسلها مبعوثة ليه. ماشي كتعبر على راي ولا كتكتب. حقاش هي ماشي صحافية وتجربتها ف"الحرة" غادي نهدرو عليها هنا. المخابرات الخارجية "لادجيد" ما يمكنش ليها تتحرك فاسرائيل كفاعلة ماشي ديك الزعيت ديال تزور اسرائيل ولكن كتنظم زيارات الصحافيين لهاد البلاد. الخارجية ما يمكنش ليها تقيس هاد الملف.
واش كاينة شي علاقة بين خوها و بين هاد التحرك؟ شوية مستبعدة. اذن باي صفة مشات. شكون رسلها. اجيو نرجعو شوية اللاور.
في الصحافة هناك قاعدة معروفة: الصحفي الفاشل فقط هو اللي كيسب جميع الصحفيين باش يخرج بخلاصة وحيدة "انا وحدي مضوي لبلاد".هاذ الأيام خرجات من جديد شامة درگوم (راس مالها الهضرة طبعا) واللي مرة كتقدم رأسها على انها "خبيرة في الاعلام الرقمي" ومرة اخرى ك"صحفية" ومؤخرا ك "محللة" لكلشي عليها موضوع في الغاسول تكتب عليه!! المهم شامة درگوم خرجات كتعطي الدروس للجميع بدءا من الدولة والحكومة مرورا بالمدير العام للأمن الوطني وصولا للصحفيين ومن جميع التيارات!!
في گود ومنذ انطلاق الموقع كنآمنو باللي اي شخص عندو الحق في التعبير عن الآراء ديالو كيفما بغات تكون سطحية او تافهة غير ما يكونش كاري حنكو (او كاري شي حاجة اخرى).
شامة درگوم ومن بعدما سالات إعطاء الدروس لكلشي، زادات شوية و"نصحات" المدير العام للامن الوطني باش ما يبقاش يبان في الصورة باش ما يتحرقش! لحد الان هادشي عادي جدا ومن حقها تنصحوا. اللي ماشي عادي هو انها بنفسها وغير بانت "الهمزة" ديال التطبيع الإماراتي الاسرائيلي شعلات فيها العافية وبدات كتشير بكل بلادة. ومن حقها تعبر على الرأي ديالها وخا يكون بليد. لكن مهاجمة الجميع طيحها في نفس الموقف اللي "حذرات" منو اخرين: تخبى اذا بنتي غادي تحرق!
وبما اننا في گود نؤمن بحرية التعبير وحتى التحيمير (لكل شخص الحق انه يكون حمار) وبما اننا ايضا نؤمن بان اللي تحط في المقلى يتقلى قررنا نهضرو شوية على شامة درگوم اللي تم منعها من النشر في گود قبل سنوات بسبب مقال سبات فيه الصحافي ناشر "الاخبار" رشيد نيني.
الدبانة شامة
ربما من الحسنات القليلة لشامة درگوم هو انها كتعرف تنقز مزيان، وأول تنقيزا ديالها كانت مع انطلاق منتديات الجزيرة توك قبل حوالي خمسة عشر سنة. شامة اللي كانت معلمة آن ذاك بدات كتكتب ما يشبه روايات عبير في المنتديات اللي كان متحكم فيها التيار الاخواني بشكل كبير. واللي خلاها تبدل شوية وتبدا اعادة تدوير ما يكتبه صحفيون مغاربة في الصحافة الورقية.
من بعد ومع استقطاب الاخوان "للمواهب" اللي عندها استعداد باش تعطيها (تعطي الموهبة ديالها). غادرات التعليم ومن بعد تجربة فاشلة في كندا ولات كتخدم مع منظمات المجتمع المدني اللي تابعة بطريقة مباشرة او غير مباشرة لتنظيم الاخوان. بلا خبار سيدنا عيسى ولات خبيييرة في "الصحافة الرقمية" بدون حتى ما تكتب مادة خبرية وحدة، وهادشي غادي يبان ملي غادي يتم تعيينها في راديو ميدي 1 فاش بغاو يطورو المحتوى الرقمي.. أشهر قلييلة غادي يكتاشفو باللي السيدة علاقتها بالصحافة لا تتعدى "العلاقات العابرة" للقارات وفقط! كان خاصهم يجريو عليها بكري غير خيار مدير الاذاعة دار بحساب ما يقال على خوها. لكن للصبر حدود. بعد ايام غادي يجريو عليها من الراديو وتلقى راسها تاني كتقلب منين غادي ضبر طريف ديال الخبز، هنا غادي يبان الحب القديم: تنظيم الاخوان المسلمين اللي غادي يكون تقوى من بعد احداث الربيع العربي وغادي تمشى "تكون" صحفيين ديالهم في بنغازي قبلما تتحول لسمسارة لصحفيين مغاربة كانت غادي تورطهم في مؤسسة إعلامية تابعة لتحالف الاخوان والقاعدة في ليبيا… ايه تحالف ديال الاخوان وعناصر القاعدة واللي خلى واحد من هؤلاء الصحفيين يقاطعها نهائيا وخا كانو أصدقاء. "بغات تورطنا مع الارهاب وما كانش فراسنا. تسوخرنا اللاور" يحكي احدهم ل"كود".
الدبانة شامة تقطع ليها طرف الخبز مع الاخوان خاصة انهم تفرتكو لا في ليبيا ولا في مصر، بانت ليها وجيبة جديدة على شي أمير وتزعمات "اللوبيين" باش يربح جائزة نوبل!! وحق مولانا الا قريتوها صحيحة ايه قالت ليه نعاونك تاخد نوبل!!
من بعد بان انها غكتهدر ومشات ليها الگاميلة الجديدة، بدلات الرادار نحو أمريكا وإسرائيل وبدات كتنقز على أساس انها من المؤثرين اللي يقدرو يسوقو لشي أفكار جابها اوباما في ولايتو الثانية واللي مازال فرعانا بيها "القوة الناعمة" مع انه دائما ما تفضل زيادة حرف اللام في الجملة في جلساتها. ما علينا غادي تبقى تكتب مرة هنا مرة لهيه باش تبقى مروجة الحركة والسفر فابور على ظهر منظمات دولية باش تحضر لندوات. كتضحك على اللى مصدقها ب"عضو =كتبات عضو ماشي عضوة كيف كديرو المدافعات على النساء= في منظمة نساء يصنعن السلام. كاليك هي المغربية الوحيدة. اكيد سمعتو هاد العبارة ديال انا بوحدي مضوية البلاد عند شحال من عينة هاد السيدة.
حتى غادي تدفع باش تخدم في موقع قناة الحرة واللي نهار طلبو ليها في الامتحان تكتب "feature" هزات التلفون كتسول الصحفيين اشنو كتعني هاد الجملة!! وبما انها "الدبانة شامة" فقضات غراض ومشات لموقع قناة الحرة بدعم من فدوى مساط اللي من بعد غادي يوقع ليها مشكل اخر ماشي وقتو دابا وغادية تضطر تستاقل وتطوي الصفحة.
وبمجرد دخولها قدرات تخلي كثار يبعدو منها. مهنيا كانت ضعيفة. حصلوها دايرة "كوبي كولي" لمقال "السي ان ان" على الفضاء يمكن. عاقو بيها. تفرشات. بغات توظف طرقها لقديمة. كينفعو هنا. دارت شهادة طبية. قالت ظهرها كيضرها. طبعا الحرة عندهم الخبرة الطبية المضادة. عاقو بيها. هاذا التزوير. خلاها تستاقل وبقات لا زين لا نجي بكري لا خدمة مقادة لا التزام، وتم تخييرها بين تمشي فحالها ولا يتابعوها قضائيا، الشيء اللي خلاها ترجع فحالها وخا بقات كتكذب وتقول الخط التحريري وكذا السيدة ما كتعرفش تكتب خبر مقاد وتزگلات من الحبس بسبب تزوير مرض في خدمة اللي تتمول من الحكومة الفيديرالية!
"القوة الناعمة"
هاذ الجملة اللي فرعات لينا كرنا بيها" يقول احد من عمل معها ل"كود". فشامة درگوم اللي كلشي اللي تيعرفها من شحال هادي قلب عليها لأنها زايدة نغزة في الكذوب وأشياء اخرى، حتى انها وصلات لواحد الفترة تخلطو عليها العرارم ما بين الحداثة والاخوان، فشي رحلة لإحدى دول أمريكا اللاثينية واللي كانت في إطار مهني، هبطات مع أصدقاء ديالها للديسكوتيك ديال الفندق، ومن بعد ناضت كتأذن وسط الديسكوتيك حتى الأصدقاء ديالها هزوها صحة وداوها للغرفة ديالها. التفاصيل لخرى ووحدة وقعات مع اخر فكازا ما كتهمناش.
علاش هادشي كتبناه ؟ لانه جا في ايطار مهني الاول رحلة مهنية والثاني علاقة مهنية كانت غادي تتحول الى "قوة غير نعامة". وهذا كيحيلنا على عدم الاتزان النفسي لشامة درگوم.
شامة العوامة
اي واحد جلس معاها مرة وحدة غادي يكتاشف انها كتعوم في الهضرة، وفِي كل مرة جراو عليها من العمل كتصنع قصة كبيييرة جدا اللي تقدر تيق بيها اذا كنتي ما كتعرفهاش مزيان، فإذا كانت لصقات طردها من قناة الحرة وموقعها في اختلاف الخط التحريري وداكشي، فقصة طردها معروفة الان ولكن اللي ما معروفش هو طردها من ميدي1 ؟ على حساب ما كتقول، انه استقلات بسباب شي تحرش. طبعا داك الشي كذوب. لسبب بسيط ما كاينش شي شكاية لا داخلية ولا عند البوليس.هي قالت لاصدقاء ليها باللي بعد العملية تأثرات نفسيا وقالتها للأخ ديالها الكولونيل ماجور (بلاتي هذا قصتو بوحدها) تدخل شقيقها وتم طرد المدير وهي من بعد تأثرت وخرجات: وهادشي كولو عومان في الهضرة وكذوب. قضية التحرش ومحاولات الاغتصاب موضوع قلنا ما نهدروش عليه حقاش كاينة شهادات اخرى من اشخاص. خليونا منو كيف قلنا
اما بخصوص الكولونيل ماجور، فكتفوا باللي الأخ ديالها هو (ركزو معايا مزيان عزيزي عزيزتي) هو "المسؤول عن سلامة المعاملات المالية الرقمية للديوان الملكي" وحق مولانا حتى قريتوها صحيحة هو اللي شاد البزطام الرقمي ديال لقصر. راه قلناها قبل.
لكن اكثر الامور غرابة وتقوليبة للامارات وحتى لجهات فالمغرب هو باش مشات شامة درگوم لمصر وبدات تعطي المعلومات ديال الصحافيين المغاربة ودراسة وهمية كانو يترزقو الله بالعدالة والتنمية استقبلت فالحساب البنكي ديالها فبنك عثمان بنجلون. مبلغ كبير. حساب شخصي قلنا. مكتب الصرف ما فخباروش والضرائب حتى هما.
من بعد دارت "ميديا كولتور اجانسي" ب10 الاف درهم كابيطال. دخلاتها 8 مليون درهم. فالحساب ديالها اللي عند كود نسخة منها ما عندهاش مصاريف من غير فياط ب175 الف درهم.
هنا كانت موجدة تختارق قاليك بهاديك القوى الناعمة الشأن الثقافي المغربي لصالح الامارات. وفق اجندات اماراتية. بعد ما خدمات فالانتخابات التشريعية باش تبيع ليهم باللي البي جي دي من الاخوان المسلمين وشي تخربيق اخر. هنا كاينين شهود: هشام العسري وبشرى اهريش.
مللي الاماراتيين عاقو بانها قولباتهم بموضوع الشان الديني والثقافي بانت كوكالة للكونسولتين بدات الازمة بدا كلشي كذوب. كلشي عقل على الازمة المغربية الاماراتية. طبعا ماشي هي وراها. ابدا وحشومة تقال. غير كانو عشرات الناس كيلوحو الحطب باش تشعل وهي ساهمات بشوية لحطب.
رجعو اللاور وحبسو لفلوس ولكن قضات الغراض وشرات شقة فمارينا بوركراك.
الاخطر هو خاصنا نعرفو شكون كان معاها فالدولة المغربية. واش من جهاز. سولنا وما لقينا حتى حد فراسو. علاش؟ حقاش عندنا معطيات انها باعت معطيات شخصية جدا على الصحافيين. واش مسافرين ولا اللا. باش تعرف هاد الشي خاص لوجيسيال ديال شرطة الحدود يكون عندك.
البحث يبين واش اعتمدات على حسابات شخصية للصحافيين ولا على شي حد اخر.
وكان الاتصال بالخارجية الاسرائيلية ودات صحافيين طبها كلها وثمنو. دابا كتقدم راسها معارضة للتطبيع معارضة لحكومة نتنياهو. حقاش باش دات هادوك الصحافيين تلاقاو مع مسؤولي هاد الحكومة. هنا كانت تخلص من جزء منها عن طريق ابو ظبي تبيع الصحافين بحال الخرفان .كيف قبل كانت كتبيع للامارات باللي دير اختراق فاوربا. بغات تلعب فالشامبيانز ليك وصافي.
الخلاصة هادشي غير محاولة بسيطة لرسم ملامح شخصية مريضة نفسيا تعاني من احباطات كتبان مرة مرة في قصص فحال ديال megamall دخلو جوج عيالات عجبتهم وبغاوني نخدم في الدعارة بمقابل مادي. اولا قصص سألني صديق ولا نصحني أصدقاء. المهم شامة درگوم وبعد فشلها فكلشي مع الاخوان وتركيا وقطر وحتى المحاولات مع الغرب ولات باغا ترجع للواجهة باي شكل من الأشكال حتى انها كانت كتحلم تلاقا مع ناشر مغربي وكتجبدو باش تبان مهمة وشي مرات كتعايرو.
اسلوب بان اليوم اكثر. تبعوها وتعرفو شوية من عقليتها.