إلتون جون غايدير عملية جراحية وقرر يأجل الحفلات ديالو حتى ل2023 – بلاغ

علن النجم البريطاني إلتون جون أنه غادي يدير عملية جراحية في فخضو وهادشي اللي غايخليه يأجل الحفلات ديالو اللي كانت مقررة قبل.
وقال المغني أنه طاح وتقصح بزاف في الفخض ديالو وواخا تبع علاج ديال الترويض بقا الصداع كثير ومزال كيعاني من هاد المشكل، وتبين أن الحل باش الألم مايبقاش هو يدير عملية جراحية ويتهنا.
وكيف جا ف بلاغ نشرو على الصفحة الرسمية ديالو فموقع "تويتر"، زاد إلتون وضح: "عارف أن الجمهور ديالي صبر بزاف من نهار تسببات جايحة كورونا في تأجيل الجولة ديالي العام اللي فات وهادشي ضرني فخاطري بزاف، ولكن سمحو ليا غادي تزيدو تصبرو معايا كثر".
وغادي تتأجل حفلات إلتون جون الباريسية من 10 و12 و13 أكتوبر 2021 إلى 25 و27 و28 يونيو 2023.
Important update on my Farewell Yellow Brick Road Tour.#EltonFarewellTour pic.twitter.com/qyPY2H0t9k
— Elton John (@eltonofficial) September 16, 2021