صرخة مالك مطاعم كازاوي: واك واك راه كنموتو وياك كورونا تراجعات علاش مازال قاتلينا بالتسعود وفتحو وفرضو الپاس سانيتار

ما خدمناش فالصيف تقريبا كلو. شهر غشت بدا السدان مع التسعود. ازمتنا غادية وتتعمق. نقصنا الخدامة ودابا حتى الابناك راها ما توقفش معانا" هادي كلمات مالك مطاعم فكازا ل"كود".
المالك غادي يتصطى غير يفهم اش من لوجيك عند الحكومة باش تصر باش المطاعم ولقهاوي يسدو مع التسعود. دابا البارح كان عدد اللي تصابو بكورونا يالله 3240 فالمغرب كولو وللي ماتو يالله 46 ونسبة الفتك نقصات ونسبة لمصابين اللي كيدخلو للانعاش تقريبا ولات ف32 بالمائة. يعني الوضعية الوبائية كلها فتحسن كبير بزاف بزاف. غير يقولو لينا علاش مازال دايرين هاد التسعود"٬ يضيف المالك غاضبا.
هو ماشي غير بوحدو اللي غاضب. صحاب مطاعم اخرى غاديين يتصطاو. شي نقص عدد اللي خدامين معاه للنص ومازال كيعاني "كاينين مطاعم للي ما كتفتحش مع لطناش. هادو كيموتو. ما كنهدروش علي الكاباريات. على المطاعم. غير تشرح لينا الحكومة المبرر وحنا معاها. دول حالاتها خايبة علينا وفاتحين الليل كولو" يوضح صاحب مطعم بيضاوي اخر ل"كود".
الحكومة ما خرجات حتى شي بيان على الوضعية الوبائية هادي مدة. دابا باش ولات حكومة تصريف الاعمال بعد تعيين اخنوش عزيز رئيسا لها مكلفا بتشكيلها٬ يمكن كلشي غادي يتسنى حتى تتشكل هاد الحكومة "ما نقدروش نزيدو تنسناو عشرين يوم اخرى" يقول مصدر "كود" الاول. راه وصلنا للحد ماديا" يضيف.
استغراب مالكي المطاعم سواء فكازا او فالمدن الاخرى خاصة السياحية هو ان نسبة التلقيح فالمغرب فاتت 50 بالمائة بهاد 17 مليون تلقاو الجرعات بجوج و20 مليون خداو الجرعة الاولى٬ وعليه كيتساءلو "علاش ما يطلقوش كلشي ويفرضو الباسبور سانيتير. ياك كيطلبوه فالتنقل. ويفرضوه فكاع الفضاءات من لقهاوي حتى لحماحم والكاباريات...
دابا شكون غادي يسمعك. بنعرفة ما بقى عندو سلطة واخنوش مازال ماشي رئيس حكومة. دابا غير مكلف بتشكيلها. مشاكل قطاعات كثيرة غادية تبقى معلقة حتى نشوفو التعيين من قبل الملك ومصادقة البرلمان على البرنامج الحكومي. تحديات كبيرة وبزاف