ماكانش فيه اللي يخدم.. أسترالي كيواجه 5 سنين ديال الحبس بعدما كذب وقال بلي مصاب بكورونا

أسترالي ماكانش فيه اللي يخدم صيفط ميساج للمدير ديالو مع الفجر قال ليه أنه مصاب بفيروس كورونا وخاصو يبقى فالدار، واخا هو صحيح مافيه والو ومابيه والو.
هاد الكذبة الصغيرة تسببات في مشاكل كبيرة في البلاصة اللي خدام فيها و25 واحد معاه صيفطوهم يديرو الحجر.
الراجل ملي شاف القضية حامضة، رجع صيفط ميساج وسط النهار قال للمدير أنه عاود دار التحاليل والنتائج خرجات سلبية.
لكن الكذبة ديالو وصلات للبوليس ملي المدير تأكد مع المختبر ولقا بللي سميتو ماكيناش عندهم أصلا، ودابا كيواجه الحبس لمدة 5 سنين بتهمة الكذوب وتعريض أشخاص وممتلكات للخطر.