صوفيا ڤيركَارا: كان فيا الكونصير هادي 20 عام ولكن ماعمرتش بيه راسي ودبا راني بيخير – فيديو

كشفات الممثلة الكولومبية صوفيا ڤيركَارا (Sofía Vergara)، خلال مشاركتها في الحدث الخيري "Stand Up to Cancer"، أنها عانات من الكونصير هادي 20 عام.
الممثلة العالمية، مولات 49 عام دبا، وضحات أنها عرفات راسها مريضة ملي كانت كدير فحوصات عادية، لكن ماعمراتش راسها بيه وحاولات ما تدخلش فديك الدوامة ديال الخوف و التفكير يوميا غير فالمرض، و لكن ركزات بزاف على تشخيص المرض و تعرف أشناهو بالضبط وتبعات العلاج ودابا هي بيخير وعلى خير.
ووضحات الممثلة، اللي جمعات بزاف الفلوس من أجل الأبحاث على الكونصير، أنها من بين المحظوظات حيت عرفات المرض بكري قبل ما يفوت الفوت.
وللإشارة فهاد البرنامج "Stand Up to Cancer" كايدوز ف عدد من القنوات التلفزيونية ف ميريكان من بينها "ABC" و"NBC" و"CBS" و"Fox".