اذاعة "فرانس إنتر" طلعاتها على الدزاير وطنزات عليها بعدما اتهمات المغرب بحرق غابات القبايل: فالواقع الجزائر ماتسرطش ليها الاعتراف الأمريكي بمغربية الصحراء واعتراف المغرب بإسرائيل ودابا كتحاول تحيد عليها اللومة وتموه الشعب وتشتت انتباهو على فشلها

قال الصحفي وكاتب العمود فإذاعة France Inter، أنتوني بيلانجر، فمقال افتتاحي، أن اتهام الحكومة الجزائرية للمغرب بالوقوف وراء الحرائق ديال الغابات عندها، واللي قتلات مية شخص فمنطقة القبايل، هي حاجة كاتضحك، ومايمكن لحتى حد يتيقها.
وبهذ المقال، اعتبرات الإذاعة أنه حاجة بليدة يدعم المغرب الوحدوية فمناطق القبايل، وفالوقت نفسو، يكون السبب فالحرائق ديالها المميتة، ولكن فالواقع "الجزائر ماتسرطش ليها الاعتراف الأمريكي بمغربية الصحراء فنهاية 2020 واعتراف المغرب بإسرائيل، اللي جاو بجوج بشكل متزامن.
واعتبرات الإذاعة الفرنسية، من خلال عمود بيلانجر، أن الجزائر، بهذ الهضرة، كتحاول تحيد عليها اللومة، وتموه الشعب وتغلط الراي العام وتشتت انتباهو عليها، وهذشي اللي فضحاتو حرائق منطقة القبايل.
وقال بيلانجر أنه ما كاينة حتى بلاصة فالبحر الأبيض المتوسط تسببات فيها حرائق الغابات فبحال هذ الخسائر البشرية الفادحة، والجزائر بانت عاجزة فمواجهة هذ الظاهرة اللي كيمكن التنبؤ بها قبل، "كيف ماعندهاش موارد جوية كافية، وكان خاص تطلب المساعدات الدولية فالوقت، وتقبل مساعدة أي واحد مدليها يديه، والمغرب على رأس القائمة، هذشي وعاد كتعاني من الأزمة الاقتصادية".
https://www.franceinter.fr/emissions/geopolitique/geopolitique-du-vendredi-20-aout-2021