حاكم نيويورك رافض يستاقل. والمساعدة ديالو "بريتاني" فرشاتو ف برنامج تلفزيوني: هو كذاب.. تحرش بيا وتعدا عليا بهاد الشكل – فيديو

بعدما قدمات شكاية، كشفات "بريتاني كوميسو" (Brittany Commisso)، المساعدة السابقة ديال حاكم نيويورك "أندرو كومو" ( Andrew Cuomo)، أنه تحرش بيها وسط بلاصة الخدمة وأنها غادي تفرش كلشي في حوار تلفزي.
بريتاني هي وحدة من بين 11 مرا تاهمو "كومو" بالتحرش لكن حاكم نيويورك نفا هادشي بمرة.
الزملاء ديالو ف الحزب الديمقراطي طالبوه باش يستاقل من المنصب ديالو، وعلى راسهم "جو بايدن" الرئيس الميريكاني، لكنه رفض ودابا يقدر يتم العزل ديالو.
وبالفعل كيفما كَالت قبل، باللي غادي تتكلم فكلشي، دارت "بريتاني كوميسو" حوار تلفزيوني حصري ف الحصة الإخبارية "CBS This Morning" اليوم الإثنين على قناة "CBS" الميريكانية.
تكلمات فيه على تفاصيل اعتداءات حاكم نيويورك المتكررة عليها وكيفاش أثر داكشي على حياتها من بعد. شهادة صادمة لضحية ديال شخص عندو نفوذ.