حميد نرجس تالف.. البي بي اس مزال معطاوهش التزكية.. وقيادي ل"كود" : موحال ياخدها

حميد نرجس احد مؤسسي حزب الاصالة والمعاصرة، تالف ومعارفش فين يترشح ومع من.
اليوم صرح نرجس بلي غايقود لائحة حزب التقدم والاشتراكية ف بنگرير.
"گود" سولت امين عام البي بي اس، وقال بلي مزال محسمناش ترشيح ديالو، وبلي المكتب السياسي مخداش تا شي قرار بهاد الخصوص.
مصادر ف البي بي اس استغربت من هاد التسرع اللي دار نرجس، واعتبرو تصريحو تجاوز للمؤسسات، مشيرة الى ان هناك امكانية كبيرة باش الحزب يرفض ترشيح نرجس.
نرجس هو خال الهمة، رجع للعمل الحزبي هاد العام ومشا عند البام باش يرشحو ومن بعد رفضوه، وموراها مشا عند ادريس لشكر وقال فلقاء حزبي بلي غادي يترشح باسم الوردة، موراها كشف مصدر قيادي فالاتحاد بانه الحزب رفضو.
بعد هاد التنقلات المكوكية وفي ظرف زمني قياسي، نرجس علن اليوم بلي غايترشح باسم التقدم والاشتراكية.
من غير هادشي كاين حديث عن ان الكائن الانتخابي المتقلب المزاج ممكن يمشي للحركة الشعبية او الاتحاد الدستوري.
هاد ظاهرة الترحال الغريبة تؤكد بلي المشهد الحزبي فالمغرب باقي كيعاني من نفس الامراض اللي كتسبب ف ضعف الثقة فالاحزاب والمؤسسات.