محكمة الاستئناف أيدات الحكم الابتدائي فقضية هناء "مولات الخمار" وعطاتها شهر ديال الحبس.. و"خارجات على القانون": كنا كنتسناو براءتها وإنصافها

قبل قليل، أيدات محكمة الاستئناف بتطوان الحكم الصادر فحق هناء، الملقبة ب"مولات الخمار"، بشهر ديال الحبس النافذ وغرامة 500 درهم، فقضية فيديو ليها كتبان فيه فوضعية إباحية، كان دار البوز مؤخرا على مواقع التواصل الاجتماعي.
مجموعة من الحقوقيين والمدافعين عن الحريات الفردية، وعلى رأسهم ائتلاف 490 المؤسس لمبادة "خارجات عل القانون"، كانو حاضرين خلال جلة اليوم اللي كان من المقرر يتم فيها النطق بالحكم، لمؤازرة هناء والوقوف فجنبها.
https://www.facebook.com/101870041219166/posts/559954748744024/
وعبرو نشطاء "خارجات على القانون" فالصفحة ديالهم على "فيسبوك"، على الارتياح ديالهم لعدم عودة هناء للحبس، بحكم انها سبق دوزات هذ المدة، لكن فالمقابل عبرو على أسفهم على عدم تبرئة هناء من التهم الموجهة ليها، و"إعمال روح القانون وإنصافها"و "رد ولو القليل من الاعتبار و الكرامة لها".
وتمت إدانة هناء بتهم "الفساد والإخلال بالحياء العام"، لكن فالمقابل ماتمش محاسبة الشريك ديالها، واخا هو اللي كان مسؤول على تسريب الفيديو الإباحي وماشي هي، وباقي لحد الساعة حر طليق.