تزامنا مع خروجها من الحبس. اعتصام إلكتروني للتضامن مع "منقبة تطوان" وإسقاط القانون اللي كيجرم العلاقات الرضائية

اليوم الأربعاء، غتخرج هناء، المنقبة بنت تطوان، من الحبس، بعدما دوزات عقوبتها الحبسية ديال شهر نافذ، بسبب تهمة "الفساد" اللي كيعاقب عليها الفصل 490 من القانون الجنائي.
واليوم، تزامنا مع خروج هناء من الحبس، قررات حركة ائتلاف 490 (خارجات على القانون) تدير اعتصام إلكتروني تضامنا معاها، تحت شعار "سطوب 490″، للمطالبة بإنصافها وإسقاط هذ القانون اللي مكيحترمش الحريات الفردية دالأفراد وكيجرم حقهم فممارسة الجنس الرضائي.
ورفضات الحركة إدانة هناء ومحاكمتها، بينما مقترف الجريمة الحقيقية مازال حر طليق، اللي سرب الفيديو ديالها بغرض التشهير بها بلا الموافقة ديالها، وهذشي اللي اعتبراتو ناتج عن عقلية ذكورية كتبرأ الرجل وتحاسب المرا وحدها.
وقالت الحركة ان الهدف من هذ الاعتصام هو مساندة هناء حتى تستأنف الحكم الصادر فحقها، والوقوف بجانبها حتى تاخد حكم البراءة.
وفالاعتصام، اللي غينطلق ابتداء من ال9 دهذ الصباح، طالبات الحركة الشباب بنشر هاشتاكَ #stop490 بخلفية حمراء، وهي الصورة اللي وضعاتها رهن إشارة اللي بغاو يشاركو فهذ الاحتجاج فصفحتها على الفايس، وطلبات منهم باش يديروها حتى فلافوطو دبروفيل ففيسبوك، ويرفقو الهاشتاكَ فجميع منشوراتهم على الموضوع.