بحري مزور صفحة الملك اللي تشد فالحبس طلع كذاب على لقاؤو مع العلمي: ما عمر الوزير وعدو بشي تخربيقة ولا هدر عليه وها القصة

عقلتو على نهار تلاقى سفيان بحري مزور صفحة خاصة بالملك على الفايسبوك٬ مع مولاي حفيظ العلمي وزير التجارة والصناعة. اللقاء ما كانش معاه بوحدو بل كان مع مغاربة جابو مشروع قالو باللي مزيان وفصالح لبلاد وطلبو لقاء قبل.
وفق مصدر من الوزارة ل"كود" فان بحري جا مع هادو وما هدرش حتى الهدرة. مصدر "كود" اضاف باللي ما نسب للوزير كلو كذوب "الوزير كيتلاقى مع كاع اللي عندو علاقة بالقطاع. وفهاد السياق كيتلاقى مع الشباب اللي عندهم مشاريع قافزة. هادي من مهامو. غير هو ما عمرو عطى شي تصريح على هاداك اللقاء او لقاءات بحالو. اما على التصاور فاكد المصدر ل"كود" "راه كيتصور مع ناس كثار بحالو بحال مسؤولين حكوميين اخرين...."
اللي تنسب ليه تضيف مصادر "كود" "كذوب ما عندها لا ساس لا والو.
هاد الشي خرج باش بحري حيح ف"ستيك هاوس" فلامارينا ديال ابي رقراق هادي يومين. كان تعتاقل ودابا راه فسجن العرجات متابع فحالة اعتقال.