دراري دارو كَلوپ ديال السورف فطرفاية كيعلمو الوليدات والبنيتات ركوب الأمواج – تصاور

ليسورفر الشباب المغاربة دارو كلوب مختص لهذ الرياضة فطرفاية جنوب المغرب، من خلال هذ المبادرة بغاو يعلمو الأطفال ديال المنطقة كيفاش يركبو الأمواج ويستمتعو، وهذ المبادرة كتهدف كذلك لفتح آفاق جديدة لهذ الوليدات، سواء الدراري أو البنات.
الكلوب سميتو le Nuevas Olas، أي الموجة الجديدة، كريياوه هذ الشباب باش يعطي لأطفال طرفاية فرصة للاستمتاع مع قلة المرافق الترفيهية فهذ الفيلاج الصغير.
وعدد البنات فالمجموعة غادي فتزايد مستمر، حسب رئيس الكلوب، حسن بولحسن، وزاد ل"رويترز": "فاللول كانو الوالدين رافضين فكرة أنهم ينخرطو فالكلوب، حيت كيسمعو ديما هبار موت المهاجرين فالبحر، لكن منين شافو الأخت ديال واحد من ليسورفور لي معانا كاينة، قدرو يزعمو ويخليو بناتهم يعيشو هذ التجربة، حتى ولا عدد البنات فالكلوب كبير.
وعشرات الوليدات والبنيتات كيحضرو لدروس ديال السورف بشكل يومي، وكيستفدو منها فابور، قبل مايبداو البراتيك كيتفرجو ففيديوهات، باش يحاولو يقلدو الحركات المسجلة، كذلك الشباب كيعطيو للمستفيدين دروس مجانية حتى فلونكَلي والسبليونية.
إيمان جميل دارت مجموعة من الصور الفوتوكَرافية ل"رويترز" لهذ المبادرة:
https://www.reuters.com/lifestyle/wider-image-moroccan-backwater-surfers-give-kids-taste-waves-freedom-2021-05-12/