بعد انتخابو أمين عام للسبع.. خوادر ل"كود": العامل منعنا من استغلال القاعة اللي كان مقرر يدار فيها المؤتمر فاللول.. ولغنيمي: النصاب القانوني كان مكتمل – تصاور

اليوم الأحد فالصباح تم انتخاب يوسف خوادر أمين عام جديد للحزب المغربي الحر، فمؤتمر استثنائي دار فمقر الحزب بالجديدة.
المؤتمر الاستثنائي لمعارضي إسحاق شارية دار فمقر الحزب، بعدما توصلات اللجنة التحضيرية برسالة من عامل الجديدة، كينهيهم فيها على تنظيمو فقاعة بنسعود بسيدي بوزيفد جماعة مولاي عبد الله بإقليم الجديدة.
وفتصريحو ل"كود" قال يوسف خوادر، الامين العام المنتخبر الجديد، أن رسالة العامل جات بحكم الظرفية الوبائية، الشي اللي خلاهم يضطرو ينظمو المؤتمر ديالهم فمقر الحزب بالجديدة، بعدد أقل من المؤتمرين، وكانو شي وحدين بغاو يجيو وطلبو منهم باش مايجيوش..
من جهتو، قال لغنيمي بالناسف، رئيس اللجنة التحضيرية للمؤتمر، أن النصاب كان مكتمل وحضرو 150 عضو من المجلس الوطني من أصل 250 عضو، وتم انتخاب البحري رئيسا للمجلس الوطني وانتخاب أعضاء المكتب السياسي.
أعضاء تقولبو وماحضروش
ولكن فالوقت نفسو، بزاف ديال الأعضاء تقولبو، ومشاو للقاعة اللي كان من المفروض يدار فيها المؤتمر، منهم أنصار الأمين العام السابق شارية، الشي لي خلاهم يظنو ان المؤتمر مادارش أو ماجا ليه حد.
وهذشي أكدو خوادر فاش قال، فتصريح ل"كود"، أنه ممكن كان مشكل فالتواصل نتج عليه هذ الديكالاج.
وحتى انصار إسحاق شارية مشاو غالطين، وظنو أن المؤتمر ماجا ليه حد، خصوصا وأن مكانو وماكانش معروف عند كلشي، والقاعة اللي كانو علنو عليها فاللول كانت كتصفر.