المحكمة الابتدائية فالرباط رفضات شكاية زيان واعترفات بشارية أمينا عاما للسبع.. والأخير ل"كود": هاد الحكم إعلان على نهاية مرحلة وبداية أخرى

رفضات المحكمة الابتدائية فالرباط، اليوم الاثنين، الشكاية المباشرة اللي تقدم بيها محمد زيان ضد إسحاق شارية ومجموعة من الأعضاء بالحزب المغربي الحر، اللي اتهمهم من خلالها بالتزوير وانتحال صفة حزبية.
وفتصريحو ل"كود"، أكد شارية أن هذ الحكم هو اعتراف بشرعيتو كأمين عام، بحكم أن شكاية زيان تحطات للطعن فصفة حسان موساوي كرئيس اللجنة التحضيرية للمؤتمر الاستثنائي، اللي تنتخب فيه شارية أمينا عاما للسبع، بالإضافة للطعن فصفتو هو ومجموعة خرين باعتباره أعضاء وقياديين فالحزب نفسو.
وأكد شارية، أن العمود الفقري ديال شكايات زيان وكل ما غيجي من بعد للطعن فالمؤتمر الاستثنائي هو هذ الشكاية الأولى.
واعتبر أن هذ الحكم هو إعلان نهاية مرحلة "ماكناش بغيناها تسالي فردهات المحاكم، لكن خاصها تسالي بطريقة طبيعية بين شباب باغيين حزب بشكل آخر، ونضال بشكل آخر أكثر حماس وواقعية، لكن كاين اللي بغاها تسالي تماك بحال إلى كنا نتنازع على شقة للكراء"، حسب تعبيرو
وتأسف شارية لهذ الوضع، وقال "الأصل فالخلافات السياسية وفالمواقف تحل فساحات النقاش والمؤتمرات، ماشي فالمحاكم".