نتنياهو ما رضاش ما هدرش معاه سيدنا. اكسيوس: راه مستاء ومكتبو: كنفيو

قالت "اكسيوس" ان رئيس الوزراء الاسرائيلي بنيامين نتانياهو ما عجبوش الحال، وفق الجريدة فان مسؤول اسرائيلي قال ليه باللي نتنياهو ما عجباتوش اللغة اللي تكتب بيها البيان اللي خرجوه لمغاربة وتضايق اكثر حقاش ما شاركش فالمكالمة الهاتفية اللي دارها الملك محمد السادس بالرئيس دونالد ترامب. مكتب نتانياهو نفى للجريدة قضية انو "مستاء".
الملك كان اتصل مباشرة بعد اتصاله بترامب برئيس السلطة الفلسطينية ابو مازن. فيها اكد ليه دفاع المغرب عن حق الشعب الفلسطيني لاقامة دولتو.
دابا دازت يومين ومازال ما كاين حتى اتصال رسمي مغربي اسرائيلي. اللي كاين فتح مكاتب اتصال اولا ثم رحلات جوية بين الدولتين ومن بعد فتح سفارات فالرباط وتل ابيب.
هاد الفيلم كولو جا بعد مرسوم رئاسي امريكي فيه اعتراف واشنطن بمغربية الصحراء وفتح قنصلية فالداخلة واستثمار كبير فبلادنا على 3 سنين.