المحاكمة الحضورية لشبكة تجنيس الإسرائيليين فكازا تسبات في احتقان كبير بين الحباسة فعكاشة

البارح كانت هضرة كثيرة دارت بين سجناء عكاشة على الفرزيات في الاستفادة من حق المحاكمة الحضورية. هاذ الشي جا بسباب مناقشة ملف شبكة تجنيس الإسرائيليين قدام غرفة الجنايات الاستئنافية بمحكمة الاستئناف فكازا، واللي رغم الوضعية الكارثية لتفشي كورونا فكازا استفادو المتهمين فيه من المحاكمة الحضورية. الملف كيعرف متابعة أكثر من 20 متهم وكلهم جابوهم من عكاشة لمقر محكمة الاستئناف بشارع شارع الجيش الملكي.
بزاف من السجناء حسو بالحكرة والتمييز في توفير شروط المحاكمة العادلة وتساءلوا كيفاش كاين ملفات فيهم غير متهم واحد أو جوج وكيتحاكمو عن بعد وهاذ الشبكة الإجرامية اللي المتهمين فيها كيتحاكموا في ملفين وعددهم كبير بزاااف لم تطبق عليهم التدابير الاحترازية للوقاية من وباء كوفيد 19، والأكثر من هاذ الشي هو قرار المحكمة البارح اللي أمر النيابة العامة بإحضار جميع المتهمين من السجن وضم الملفين واستمرار المرافعة زوال غدا الجمعة.
المشكل دابا هو أن الضغط اللي مارسو دفاع المتهمين على النيابة العامة جاب نتيجة وعلاش باقي الملفات اللي فيها متهم واحد او جوج، دارت النيابة العامة دارت عين ميكة و لم تمارس سلطتها في إطار القانون وأمرت بإحضار المتهمين إلى المحكمة حسب طلبات المحامين ديالهم..