عاجل. علاش تسجلات 37 حالة فالعيون وواش عندها علاقة بالحريگ وبهادوك 14 حالة اللي لقاوها فكناريا؟ تفاصيل جابتها ليكم "كود"

Elouali.zaz.1987@gmail.com
صدمة فجهة العيون الساقية الحمراء بعدما 37 واحد لقاو فيه "كورونا فيروس" دقة وحدة. هاد الشي من البارح مع الستة لهاد الصباح. الجهة ولى فيها دابا 44 إصابة مؤكدة.
على حساب كود"، فقد سجلت مدينة الطرفاية في الساعات الأولى من اليوم الأحد 37 إصابة جديدة بهاد الفيروس وكلها بين مهاجرين افارقة جنوب الصحرا. حسب مصدر "كود" فهادو بغاو يحرگو لاوربا وهما من السينگال وغينيا ومالي والكوت ديفوار كلهم فوضعية ماشي قانونية فالبلاد وكلهم كاينين فمركز للايواء بالمدينة.
هاد الشي بدا وفق مصدر "كود" بعد ما تم احباط عملية للهجرة السرية وتشد فيها 50 شخصا من دول جنوب الصحراء قبل أيام. ولكن اللي خلى المغرب يدير ليهم التيست هو ما وقع فجزر الكناري قبل ايام. دخلو شي وحدين من المغرب ودارو ليهم التيست ولقاو 14 واحد فيه كورونا. هاد الشي خلى المغرب يدير تحاليل لهاد المهاجرين ولقاو 37 حالة.
مصدر مطلع أكد ل"كود" أن المعنيين كانو خاضعين للحجر وغادي يمشيو من الكرفاية ديريكت لبنجرير بدون ما يدوزو على سبيطار بن المهدي في العيون.