واش غتحل الحدود وترجع الرحلات الجوية لبرا.. لارام مخصصة سفريات للخارج ابتداء من 16 يونيو

لونصات الخطوط الملكية المغربية (لارام) رحلات جوية ابتداء من 16 يونيو لمجموعة من الدول، من بينها ميريكان، فرانسا وسبانيا، وبعض الدول العربية بحال مصر، وبالآلي والروتور، ومعظم هذ الرحلات غتنطلق من مطار محمد الخامس الدولي فكازا، ومطار مراكش.
فالموقع ديالها الإلكتروني، مادارت لارام حتى شي إعلان على استئناف الرحلات، لكن بمجرد الدخول للكالوندريي ديال "ليفول"، كيمكن لأي واحد يشري التذاكر ديالو لرحلات غتكون ف16 يونيو، بالإضافة لرحلات أخرى على طول السيمانة الجاية.
مجموعة من المغاربة ماتاقوش فهذ الرحلات، ورفضو يخلصو ليبيي، فغياب أي إعلان رسمي كيأكد استئناف الرحلات للخارج، سوا من السلطات او من شركة الطيران المغربية.
و"كود" تواصلات مع المكلف بالتواصل فالشركة وسولاتو على استئناف الرحلات الجوية، لكن لحد الساعة ماتلقات حتى شي جواب.
وكيجي هذشي من بعد ما بداو دول الاتحاد الاوروبي فتخفيف القيود على الرحلات الجوية، وإعداد بروطوكول لاستئنافها فظل أزمة فيروس كورونا المستجد.
وللإشارة، وبسباب توقف الرحلات الجوية فالمغرب، لارام خسرات أكثر من 1,6 مليار دولار، وهذشي خلاها على حافة الإفلاس، فغياب أي دعم يقدر ينقذها.