علاش الإصابات فكازا مرتفعة.. اليوبي ل"كود": السكان كثار والناس ماملتازماش بالحجر الصحي

كازا سطات هي الجهة الوحيدة اللي مازال كتسجل حصيلة كبيرة ديال الإصابات اليومية بفيروس كورونا المستجد بالمقارنة مع الجهات الأخرى، بحيت جميع المناطق عرفات انخفاض فالإصابات بوتيرة ملحوظة، باستثناءها هي.
فحديثو على الأسباب اللي خلات جهة كازا سطات تكون فمقدمة ترتيب الجهات اللي كاتسجل إصابات يومية كثيرة، قال محمد اليوبي، مدير مديرية الأوبئة ومحاربة الأمراض فوزارة الصحة، أنه من الطبيعي كازا تعرف إصابات كثيرة بسبب العدد الكبير ديال السكان ديالها أولا، وبسبب أن مجموعة من الناس ماملتازماش بشكل كبير بتعاليم الوقاية والحجر الصحي.
وقال اليوبي، فتصريحو ل"كود"، أنه "كاينين صور منشورة كتبين لينا أن الناس ماملتزمينش ومامحتارمينش الإجراءات الوقائية فالأسواق ووسائل النقل، وبالتالي إلا الناس التزمو بالتباعد الجسدي ودارو الكمامات وماخرجو من ديورهم غير للضرورة والتزمو بغسل اليدين فيمكن لينا نشوفو المستقبل بتفاؤل، وإلا فغادي يستمرو الحالات فالمناطق اللي ماكتحترمش هذشي وهذا شيء طبيعي".
وكشف المسؤول فوزارة الصحة أن تقريبا جل الناس اللي كيتم الكشف على إصابتهم بكورونا فكازا كيكون فمرحلة مبكرة وعن طريق تتبع المخالطين، اللي ماعندهوم حتى شي أعراض ديال الإصابة بالفيروس، وصحتهم مزيانة، وماوصلاتش بيهم درجة المرض، "بمعنى كلقاو 2 او 3 حالات، فكنديرو الكشف على جميع الناس اللي كاينين فديك العائلة أو الوحدة الصناعية، عاد كلقاو مصابين، وهذشي اللي كيفسر ارتفاع عدد الإصابات"، على حساب هضرتو.