خرج باش يحتج حيت ماعطاوهش القفة.. شهرين دالحبس و1000 درهم غرامة لشاب خرق حالة الطوارئ الصحية فآسفي

حكمات المحكمة الابتدائية فآسفي، اليوم الاثنين، على شاب بالحبس شهراين وغرامة ديال 1000 درهم، بسبب عدم وضع الكمامة وخرق حالة الطوارئ الصحية والتحريض على خرقها، من بعد ما شارك فشي احتجاجات فمقاطعة القليعة.
وكان تشد المتهم (ت.ع) غير فالأسبوع اللي فات، فاش احتج هو وناس خرين حيت ما حصلوش على القفف ديال المونة الغذائية اللي كتعطيها السلطات المحلية فالمنطقة.
وتم تداول فيديو الشاب على نطاق واسع من وسط الوقفة الاحتجاجية، واللي قال فيه بللي ماعندوش الفلوس باش يشري الكمامة، وكيحتج حيت ماخداش القفة.