المتخلفة صوفيا طالوني مازال زايدة فيه.. دارت لايف حلفات لا اعتذرات فيه للمثليين واخا هي سبابهم فالحملة التشهيرية اللي تدارت ضدهم

لبارح صوفيا طالوني مازال زايدة فيه، دارت لايف ف"أنستكَرام"، وحلفات لا اعتذرات على داكشي اللي دارت، وقالت بللي المثليين هوما اللي دفعوها باش تتكلم على التطبيقات، وماوضحاتش الأسباب.
اللايف الطويل اللي دارتو لبارح فالليل جات ترد فيه على المنتقدين، وتقول بللي هي ماشي سباب التشهير بحتى واحد، باش يدخل الممثل فيصل عزيزي على الخط حتى هو، ويطالبها بالاعتذار، لكن هي رفضات.
وماشي غير هذشي، خلات صلب الموضوع اللي كيتكلم معاها فيه عزيزي، وشخصنات الأمور، وبدات تعايرو وتعاير طريقتو فالكلام، واعتبراتو حتى هو مثلي غير ما مبينش وماباغيش يعلن عليها.
وللإشارة، كانت المتحولة الجنسية صوفيا طالوني دارت لايف فالكونط ديالها فأنستكَرام، هضرات فيه على كَاع التطبيقات اللي كيدخلو ليها المثليين، وهذشي خلا مجموعة من المتخلفين يدخلو ليها، ويهزو تصاورهم، ويشهرو بيهم ف"فيسبوك".