سكوب. مع اجبارية لكمايم الاقتصاد غادي يبدا يتحرك وها وقتاش غادية ترجع شي قطاعات للخدمة

علمت "كود" ان الحياة غادية ترجع للاقتصاد المغربي فالقريب العاجل. وتوقع مصدر رفيع المستوى ل"كود" باللي هاد الشي يقدر يكون من هنا ل3 السيمانات. هاد الشي اللي كيفسر علاش تم فرض الكمايم على جميع المواطنين. هادي مقدمة باش الروح ترجع لبعض المصانع والقطاعات.
واكد مصدر "كود" ان هاد الشي غادي يكون بالتدريج. دابا شي شركات فالنسيج ولات كدير لكمايم وهي خدامة دابا. شركات اخرى غادية ترجع بشوية بشوية.
لحد الان راه المغرب ماشي بحال اسبانيا او ايطاليا. كاينين اوراش فالعقار خدامين وكاينين معامل خدامين وكاينين ليسونتر دابيل خدامين.
ووفق مصدر "كود" حتى مصنع "بوجو" غادي يرجع للخدمة خلال مدة اقصاها 4 سيمانات وممكن جدا قبل.
المغرب بهاد الاجراء باغي يوقف الخسائر لكبيرة على الاقتصاد بسباب هاد كورونا. فالحقيقة الاجراءات اللي دارت خلاتنا نتنفسو.
القطاع اللي غادي يخلص بزاف هو القطاع السياحي ومعاه العقار. دابا قطاع النسيج كلى لعصا ولكن غادي يخرج من الازمة قبل من السياحة.