وزارة الصحة سمحات باستعمال "الكلوروكين" فالصبيطارات باش تعالج اللي فيهم "كورونا فيروس"

وصات اللجنة الاستشارية التقنية والعلمية للبرنامج الوطني للوقاية من الإنفلونزا والأمراض التنفسية الحادة، التابعة لوزارة الصحة المغربية، بشكل رسمي، اليوم الاثنين، بالاستعمال المؤقت لمادة الكلوروكين وسولفات الهيدروكسي كلوروكين، بالإضافة لمزيج "اللوبينافير"، اللي مامسموحش بالبيع ديالو فالسوق، من أجل ممعالجة المصابين بفيروس "كورونا" .
ووضحات مذكرة ديال وزارة الصحة، موجهة للمدراء ديال المستشفيات الجامعية، والمدراء الجهويون ديال الصحة، بللي "نظرا للحالة ديال الطوارئ اللي كتعرفها الصحة العامة والخطورة اللي كيشكل فيروس "كورونا"، اللجنة قدمات هذ الاقتراح المؤقت لاستعمال الأدوية اللي كتحتوي على الكلوروكين".
وفالمذكرة نفسها، أكدات اللجنة بللي هذ النوع من الأدوية غدي يتستعمل كن طرف الأطر الطبية فقط، وماغايمكنش يتباع للناس العاديين، كيف لزمات اللجنة على المدراء ديال المستشفيات الجامعية والمدراء الجهويين ديال الصحة باش يعلموها إلى كانت السبيطارات فيها نقص ديال هذ الأدوية، ويعلموها بالكمية اللي عندهم فالسطوك باش يزيدو يدعموها، كيف طلباتهم يعلموها إلى كان عندهم نقص حاد فيها.
واستنادا للاجتماع الثاني ديال البروتوكول العلاجي اللي دارت اللجنة، بتنسيق مع مديرية الاوبئة والوقاية من الأمراض، ومن خلال الفحص السريري ديال عدد من المصابين بالفيروس، واللي وضعيتهم مستقرة، حددات الوزارة معايير العلاج بهذ الأدوية، سواء فالحالات العادية أو فحالات الإنعاش، كذلك غاتم الاعتماد على هذ الأدوية للقيام بالتشخيص السريع للمرض ولحالة المريض.