واش “كورونا” كيدور فالمغرب؟ مدير مديرية الأوبئة ل”كود”: هذا احتمال ضعيف جدا

بعد تسجيل أول إصابة بفيروس “كورونا” المستجد فالمغرب، قال محمد اليوبي، مدير مديرية الأوبئة ومحاربة الأمراض، والمسؤول على اللجنة الوطنية للقيادة، بللي المغاربة ماعندهم علاش يخافو، وجميع المؤشرات كتأكد بللي الفيروس مكايدورش بيناتنا، واحتمال وجودو ضعيف جدا.
وبالنسبة لفعالية إجراء المراقبة فالموانئ والمطارات، قال اليوبي، فتصريحو ل”كود” بللي فنقاط العبور كتم مراقبة حرارة العائدين من الدول الموبوئة، لكن ماشي بالضرورة كَاع هذ الناس مايكونش فيهم الفيروس، حيت كاين احتمال يكون ماباينش، يعني ففترة حضانة ديال 14 ليوم اللي كتسبق الإصابة بالمرض وارتفاع درجة الحرارة.
وعبر اليوبي على استحالة منع الفيروس باش مايدخلش للمغرب، “لكن حنا كنقومو بتتبع الحالات المشكوك فيها، وكنعرفو المدن اللي غايتاجهو ليها، وكانحتفظو ببطاقتهم الصحية، وكنعطيوهم رقم “ألو اليقظة الوبائية”، باش يتصلو فيه”، على حد تعبيرو.
وقال بللي الهدف من الإجراء هو يتنقص من عدد المصابين بالفيروس، لأنه كاين احتمال كبير يبانو ناس مراض بيه ودرجة حراتهم مرتفعة فنقاط العبور، وهكذا ممكن ينقص عدد المصابين بالفيروس لأدنى حد ممكن.
وغير هذ الصباح دارت وزارة الصحة ندوة صحافية من أجل تسليط الضوء على وضعية أول مصاب بفيروس “كورونا” فالمغرب، وتنوير الرأي العام وطمأنتو.