الله يحد الباس وصافي. اللي لقاو فيه “كورونا فيروس” فكلميم دار عراضا وحضر لوحدة اخرى ومشى للجامع ..

البارح علنات وزارة الصحة على حالات جديدة فيها “كورونا فيروس” منها واحد فكلميم. هاد الراجل وفق مصدر “كود” باش وصل للمغرب من برا دار زردة وطبعا بحال اي زردة حضروها الناس. ماشي غير هاد الشي يقول مصدر “كود” باللي حضر لعراضة اخرى وصلى فالجامع اكثر من مرة ودار على لحوانت باش يتقضى.
السيد وفق مصدر “كود” ان السيد تنقل لجماعة تكانت فين كيصايب وراق شي ارض عندو، وزاد مشا لعند شي معالِجة طبيعية كداوي مرض بوصفير فحي التواغيل. والبارح وبمجرد الاعلان رسميا عن تأكيد حالتو ولاية جهة كلميم دارت اجتماع أمتي باش يتم حصر عدد الناس لي تلاقهم وكَلس معاهم.
دابا هاد السيد كيف كانت كتبات “كود” “جا فكار من فرانسا”
دابا السلطات كتشوف شحال من واحد تلاقاه. الايجابي فهاد الشي هو ان مراتو وفق مصدر “كود” ما فيهاش كورونا فيروس. لكن هاد الشي ما كيعنيش ان الخطر بعد. يقدر يبقى لمدة خاصها هي وكاع اللي تلاقاهم حجر صحي. هاد الشي علاش مهم بزاف اي واحد يبقى فدارو. هاكا الخطر غادي يقل