شركة “شاومي” الشينوية روبلاتها فكازا بسباب كورونا والبوليس دخلو وفرقو الجوقة

فعز هاد الأجواء لي كيعيش العالم بانتشار فيروس كورونا، شركة “شاومي” الشينوية ديال التلفونات اختارت في وقت غير مناسب نهائيا تفتتح محل جديد ديالها في الزرقطوني. الأمور تطورات بشكل كبير بزاف وناضت الفتنة والدنيا ترونات في واحد من أكبر شوارع كازا.
الموظفين في المحل كاملين كانو دايرين الماسكات وفيهم مسؤولين من الصين، المغاربة ملي شافو الكاميرات والجوقة وبعض المؤثرات كيصورو ظنو أنهم كيفرقو الماسكات ضد الفيروس وهادشي لي خلاهم يشدو الصف وولاو كثر من 50 واحد.
والتبركَيكَة لي جابت “كَود” أن البوليس دخلو بشكل مباشر ومنعو الافتتاح وفرقو الناس لي تجوقو.
البلاد حاليا في حالة حذر وخاص كولشي يساهم باش نحافظو على سلامتنا وسلامة الاخر، ولو هاد المسؤولين لي تعاملو مع آجونس مغربية فكرو غير شوية، كانو غادي يأجلو هاد الحدث لموعد آخر.