المغرب ولا محاصر ب”كورونا” من جميع الجهات.. تسجيل جوج إصابات بالفيروس فالبرتغال

علن وزير الصحة البرتغالي، مارتا تيميدو، اليوم الإثنين، على تسجيل جوج حالات ديال الإصابة بفيروس “كورونا” المستجد (كوفيد 19).
وعلى حساب ما أفادت تقارير إخبارية، فمن ضمن الحالات اللي تصابو بالفيروس طبيب برتغالي كان مدوز العطلة ديالو فشمال إيطاليا.
وارتفع عدد حالات الإصابة بفيروس كورونا فإسبانيا ل84 حالة، من ضمنها جوج إصابات فجزر الكناري، وهذشي من غير تسجيل أي حالة للوفاة.
والجزائر بدورها تقاست بالفيروس، وارتفع عدد المصابين بيه فيها لبارح ل3 إصابات، بعدما علنات السلطات الجزائرية إصابة أم وبنتها، كان جا عندهم قريب ليهم من فرانسا نقل ليهم عدوى الفيروس، بالإضافة لإصابة إيطالي خدام فالحقول ديال البترول وكيمشي لإيطاليا مرة مرة.
وكيتبين بللي المغرب ولا دبا محاصر من كَاع الجهات، باستثناء الجنوب، بفيروس “كورونا” المستجد، اللي انتشر فمختلف دول العالم، وكيحصد أرواح العشرات يوميا، خصوصا فالشينوا اللي بان فيها أول مرة وحولها لدولة موبوؤة، ثم كوريا الجنوبية، وإيطاليا، وإيران.