كشفات المندوبية السامية للتخطيط على أرقام صادمة بخصوص السكان النشيطين والمشتغلين فالبلاد فسنة 2019، وأكدات بللي المغاربة اللي فسن النشاط وقادرين يخدمو (عندهم أكثر من 15 سنة)، كيبلغ العدد ديالهم 26 مليون و359 ألف شخص، منهم 14 لمليون و277 ألف خارج سوق الشغل، بينما 12 لمليون و82 ألف واحد اللي بقاو فيهوم 10 مليون و975 ألف فقط اللي خدامين، ومليون و107 بطاليين. والمندوبية أكدات، فالمذكرة الإخبارية الأخيرة ليها، نسبة الشغل على المستوى الوطني بلغات 41,6 فالمية، وحددات نسبة الرجال اللي خدامين ف65,5 فالمية مقابل 18,6 فالمية ديال العيالات. وكشفات بللي 55,4 فالمية من الناس اللي خدامين ماعندهمش شهادة، وأغلبهم خدامين فقطاع الفلاحة، بينما 29,6 فالمية من اللي خدامين حاصلين على شهادة متوسطة، و14,9 فالمية على شواهد عليا. وحسب المندوبية، بلغات نسبة الشباب اللي كتتراوح أعمارهم بين 15 و34 وخدامين نسبة 36 فالمية، 42,8 منهم كيسكنوا فالقرى، ومن ضمنهم 22,7 فالمية دالعيالات، وأكدات بللي معدل الشغل فالعروبية مرتفع على فالمدينة، بحيت 36,9 فالمية خدامين فالمدينة، و50,3 فالنية خدامين فالعروبية. وعلى مستوى نسبة التشغيل فمختلف القطاعات، فقطاع الخدمات كيشغل أكبر نسبة من السكان النشيطين، واللي هي 44,9 (أي 4 مليون و927 ألف شخص)، موراه قطاع الفلاحة بنسبة 32,5 فالمية (3 دالمليون و568 ألف شخص)، وموراه قطاع الصناعة اللي كيتضمن حتى الصناعة التقليدية بنسبة 12 فالمية (مليون و317 صانع)، واخيرا قطاع البناء بنسبة 10,5 فالمية (مليون و148 شخص). وفئة السالاريي هي اللي كثيرة فالمغرب، وكيمثلو 50,1 فالمية من السكان النشيطين، مقابل فئة الفريلانس اللي كتشكل نسبة 30,2 فالمية، بينما فئة المساعدين العائليين كتشكل 14,7 فالمية، والخدامة العاديين كيشكلو نسبة 2,4 فالمية فقط.
