بالفيديو. بونو حارس الاسود فحوار حصري مع “كود”:ما كاينش اللي ما كيشكرش رونار من اللعابة

“ما كاينش اللي ما كيشكرش رونار من لعابة المنتخب الوطني”٬ هاد التصريح قالو ل”كود” فحوار حصري من اشبيلية حارس المنتخب المغربي لكرة القدم ياسين بونو. بونو اللي سالى تدريباتو مع فرقتو ودار هاد الحوار هاد السيمانا قال باللي هاد المدرب عطى لكثير للكورة المغربية ووصلها للعالمية فاشارة الى الاداء لكبير للمنتخب فمونديال روسيا الاخير.
وذكر بونو باللي المنتخب قبل “ما كانش كاع فالساحة العالمية” حتى الافريقية “كنلقاو صعوبات باش نتأهلو” لكأس افريقيا. رونار٬ وفق تصريح ياسين بونو ل”كود” “رجع الروح” وعطى “عقلية تنافسية للمنتخب الوطني”٬ واضاف انو معاه مشينا لكأس العالم.
بخصوص مغادرته للاسود قال بونو ل”كود” ان “لويسيكل يوصل اللخر ديالو” و”انو باش توصل للقمة بحال كأس العالم”٬ المدرب “كيقلب على تحديات جداد” كما اوضح ان الواحد اللي ما كيديرش بحال هاد الشي “راه الكورة كتعاقبو. ومللي الكورة كيتعاقبك فالواحد كيفكر فتحديات جديدة”.
هاد الشي علاش مشى كيقلب عليها مع المنتخب السعودي بعد خروج الاسود فثمن نهاية كأس افريقيا الاخير.