جوج بلاجكة من اصل مغربي ولاو ابطال بعدما أهلو بلادهم للربع فالمونديال ومحاو صورة الارهاب. واحد كيحماق على بلاد بوه وديما كيخدمها ويخدم مغاربة بلجيكا بزاف واخا المدرب فتحي جمال جرى عليه والثاني واخد مسافة بزاف ومبعد

لبارح البلاجكة من اصل مغربي فنهارهم. فنهارهم حقاش رجعو خسارة بجوج لزيرو ضد اليابان فثمن نهاية كأس العالم روسيا 2018 الى فوز. مروان فيلايني ماركا التعادل ف74 وناصر الشادلي قتل اليابانيين بهدف الفوز فاخر دقيقة ديال اللعب.
البلاجكة من اصل مغربي عندهم وزن فبلجيكا. باش تعرفو مزيان هاد الشي فهم كيمثلو 30 بالمائة من سكان بروكسيل العاصمة وكيمثلو 10 بالمائة من سكان بلجيكا كلها. مع الصورة اللي لصقاتهم اخيرا بالارهاب عقب الهجمات الارهابية بفرنسا واعمال ارهابية ببروكسيل. اللي تورطو فيها بزاف مغاربة من اصل بلجيكي كيعيشو فاحياء فبروكسيل منها مولمبيك الشهير.
فيلايني والشاذلي غاديين ينسيو بلجيكا واوربا كلها شوية غير شوية صلاح عبد السلام احد المتورطين في الهجوم الارهابي على باريس والوحيد اللي باقي عايش من مجموعته تلك.
البارح باش سالى الماتش بان فيديو ديال لعاب بلجيكي اسمو باتشوايي شاد ففيلايني “المغربي”. شاد فيه على تمغرابيت ديالو. عارفو مزيان. هاد اللعاب وفق مصدر ديبلوماسي في تصريح سابق ل”كود” “كيموت على شي حاجة اسمها المغرب. عزيز عليه لبلاد. كيدير بزاف لاولاد الجالية من تجهيزات رياضية وملاعب ووو. فين ما وقفتي عليه شي حاجة ديال المغرب او ديال الجالية حاضر فيها”. طبيعي فوالدو كان حارس للرجاء البيضاوي فالسبيعات. هاد البيضاوي اللي هاجر لبلجيكا كيحماق على بلادو لدرجة انو باش ولدو مروان كان فعمرو 16 عام هزو بفلوسو وجابو للمنتخب الشبان. كان مدربو حينها رجاوي اخر هو فتحي جمال. القصة عارفينها. جمال قال لوالد لمروان فيلايني باللي ولدو ما صالحش للكورة. رفضو. تصورو معزة بلادو فين وصلات. ومع ذلك ما حقدش على لبلاد ما كرههاش. بقى ديما ومازال كيدير بزاف للبلاد.
ناصر الشادلي هادا كان حاسم “هاد اللعاب بعيد بزاف على كل ما هو مغربي فبلجيكا. خاصة المغرب الرسمي. ما كيقرب منو ما كيجي حدا. عايش بلجيكي وما عمرو دعم شي حاجة خاصة ببلادو =حقاش بحال فيلايني عندو الجنسية المغربية= يشرح مصدر “كود”.
ماشي المغرب اللي مهم فهاد القضية بل هادوك اللي اصلهم من هاد البلاد وعايشين فبلجيكا ودازت عليهم هادي 3 سنين قاصحة وصورتهم ولات مرتابطة بالارهاب. هادو اكثر ناس عاونهم هاد التأهل ديال البارح ضد اليابان