كلاش بالمعاني.. البيگ وطوطو خرجو لديزي دروس نيشان والحرب بدات تاني -فيديو

عام بعد الكلاش الأول بين عمر السهيلي المعروف ب”ديزي دروس” وتوفيق حازب المعروف ب”البيگ”، رجع هاد اللخر البارح الجمعة مع طوطو وكلاشاو ميستر كازافونيا بكلاش ديال الراب حقيقي ما كين فيه غير الهضرة من السمطة لتحت.
الفيديو كليب الجديد اللي اسمو ” d.d.d” واللي كيعنيو بيه “دق دور دوق” واللي دار نص مليون مشاهدة فأقل من 24 ساعة كلاشاو فيه ديزي دروس، اللي دكروه بواحد من ألقابو اللي هو “نيكَا” لي هي “عزي” ولي مشهور بيها عمر السهيلي بعيدا على العنصرية (نيگا nigga اسم كيطلقوه السود ديال مريكان على بعضياتهم وماعندو علاقة بنيگر nigger لي هو نعت قدحي وعنصري)، وقالوها جوج مرات في الاغنية.
المهم الأغنية فيها قواعد الراب الأمريكي غير هو بالدارجة.
كلشي من البارح كيتسنا اش غادي يقول ديزي دروس، وحتى لدابا ما كتب والو فانستكَرام، وهو المكان اللي ديما ديزي دروس معشش فيه.
والمعروف عالميا أن الكلاش مابين الحاجات اللي كيزيدو بفن الراب للقدام، حيت كل فنان كيبغي يجبد فيه أحسن ما عندو، وهادشي لاحظناه داك العام كيفاش النيفو ديال الراب تبدل ملي تكلاشا دون بيگ وديزي دروس، وحتى من قبل ملي كان الكلاش بين مسلم وحازب.