ديزي دروس رجع الصرف للبيك بكلاش جبد فيه الملك وباطمة والرمضاني وابو زعيتر والعلالب وأقريو.. القاصح – فيديو

الرابور عمر السهيلي المعروف بديزي دروس حط اليوم الكلاش لي جاوب فيه البيكَ على 170kg، ومن البدية عطاه العصير وبدا ليه بعمتو ميلودة حازب، وداز للوسام والملك والدعم وموازين ونت غادي.
عزي عندو ستيلو خصص كلاش فيه 7 ديال الدقايق كيعطي فيه غير القاصح، ومن البيگ داز الباطمة ورشيد العلالي وابو زعيتر صاحب الملك، وحتى سمية اقريو منساهاش، وكان حاضر معاهم حتى رضوان الرمضاني.
وعلى عكس الدراري ،ديزي مختارش الوزن ديالو عنوان للكلاش، وانما سمى الاغنية “المتنبي”، والهضرة كانت نيشان وقاصحة.
دابا الكلاش مابقاش بيراطاج، ولا كيتجبد فيه الملك وكيتحطو النقط على الحروف، بلغة الزنقة وبلا فرانات، وهذا هو الراب، وهادي هي اللعبة.