مشاو للمدرسة وماعاودوش ولاو.. استنفار أمني بعد اختفاء قاصرين بحي الفتح فالرباط

تخلعو سكان حي الفتح بالرباط، وخرجو للشارع مهولين، البارح بالليل، من بعد اختفاء قاصرين كيقراو فمدرسة خصوصية فالحي نفسو، وكيتعلق الأمر بلينا بنكروم (13 لعام) والمهدي زيدون (14 لعام).
وحسب المعطيات المتوفرة ل”كود”، فالقاصران مشاو للمدرسة لبارح مع الجوج، ومعاودوش ولاو، مع العلم أن هذ المؤسسة كتمنع عليهم يدخلو التيليفون للمدرسة، وهاذشي علاش عائلاتهم ماستطعوش يتواصلوا معاهم.
وفتصريح أم لينا ل”كود”، قالت بللي بنتها “مارجعاتش من المدرسة من لبارح، والبوليس جاو ودارو كثر من جهدهم وعزز جميع قواتو باش يلقاو الدراري لكن والو”.
وقالت الأم بللي حتى القايد وأعوان السلطة جاو باش يآزرو عائلات القاصرين، ويحاولوا من جهتهم البحث عن لينا ومهدي.
وتنشرات صور القاصرين المختفيين على نطاق واسع فمواقع التواصل الاجتماعي، وطالبو عائلات المختفيين التعاون معهم والإبلاغ عن أي معلومة تفيد العثور عليهما.