4 أشخاص شعلوا العافية فقاصر وهو حي فالهراويين

تعرض قاصر فعمرو 16، سميتو (ع.ب)، للحرق وهو حي من طرف ربعة دالأشخاص فمنطقة الهراويين فكازا.
وحسب إفادة عمة الضحية ل”كود”، كانت الخميس اللي فات الجلسة الثانية ديال الملف فمحكمة الاستئناف فكازا، وللي خرج فيها القاضي بقرار منح السراح المؤقت للمتهمين بربعة من بعدما خلصوا كفالة مالية، قبل ما يتقرر تأجيل الملف لنهار 29 فهاذ الشهر.
عمة القاصر أكدات بللي العائلة كاتعاني من حالة الفقر والعوز والتكرفيص، وبسباب هاتشي ماستاطعاتش تخلص محامي يتكلف ليها بقضية ولدها.
وقالت العمة بللي المتهمين بربعة وقفوا على القاصر (ع.ب) باش يكَريسيوه، وملي مابغاش يعطي ليهوم التيليفون، حيحيدوا ليه جيكيطتو، وخواوا على صدرو ليسونص، وشعلو فيه العافية، وبقاوا يتشفاو فيه ويضحكو عليه.
وحسبها، قدر الشاب، اللي تصاب بحروق خطيرة من الدرجة الثالثة، أنه يطفي العافية للي شعلات فصدرو من بعد ما مرغ راسو فالأرض، قبل ما تهزو لومبيلونص.
وقالت بللي الشاب نعس فصبيطار ابن رشد “موريزكَو” 35 يوم باش يتعالج من الحروق لي تصاب بيها، وللي خلاتليه آثار مستديمة على لحمو.
وكانت الأم ديال القاصر وضعات شكاية عند الدرك الملكي لمنطقة الهراويين بالمعنيين بالأمر للي كايسكنو فنفس الحومة للي كايسكن فيها الضحية.