ماتش دالعيون…نجوم تلات بيهم فمراكش وخراين جاو مع عيالاتهم.. والحاجي ضيوف شيش قبل ما يمشي

تحول فندق بمراكش إلى قبلة لنجوم العالم هاد العشية استعدادا للماتش الاستعراضي، لي غادي يكون بملعب الشيخ الاغضف ف العيون غدا الأربعاء في إطار الاستعدادات بالمسيرة الخضراء.
بزاف ديال اللعابة جاو بكري للأوطيل، وفيهم لي جاب معاه مراتو، بحال ريفالدو واللاعب المصري خالد الغندور ولعابة أخرين.
أغلب النجوم وصلوا وتصوروا مع المعجبين وعطاوا تصريحات للصحافية. كلشي كان فرحان حتا البرازيلي كافو اعطا تصريحات بالبرتغالية وشي شيوية ديال صبليونية.
وبعض اللعابة الأفارقة فضلوا يشيشو، وهما كيتفرجوا ف الماتش ديال برشلونة وسلافيا براگ، من بينهم السنغالي الحاجي ضيوف. بقاو شوية ف الأوطيل، ومن تم توجهوا لفندق اخر باش يتعشاو فيه.
اللعابة وبعض المنظمين والمسؤولين غادي يمشيو غدا ف الصباح العيون في طيارة خاصة من مطار مراكش المنارة وطيارة أخرى غادي تدي الصحافيين المغاربة والأجانب.