متولي حيح فالفيستيير.. ماتقبلش يبقا روبلاسون وكارتيرون: ما دخلتوش لحقاش كان بليسي

محسن متولي متقبلش يبقا روبلاسون ف الديربي، لي جمع الرجاء والوداد البيضاويين اليوم الأحد بملعب مركب محمد الخامس في الدار البيضاء، برسم ذهاب ثمن نهائي كأس محمد السادس للأندية الأبطال.
مصدر مقرب أكد ل “كود”، أن متولي حيح ف الفيستيير ما رضاش يكون روبلاسون، لحقاش كان عوال على هاد الديربي باش يبين إمكانياتو، لكن المدرب باتريس كارتيرون كان عندو رأي 0خر.
وحسب هاد المصدر، أن أطراف تدخلات باش تهدأ اللاعب متولي وبرداتو شوية، وهادكشي علاش دخل ف الشوط الثاني.
كارتيرون خلا متولي ف الاحتياط لحقاش مالعبش الماتش، لي فات كونتر أولمبيك أسفي.
مدرب الرجا برر سبب عدم مشاركة محسن متولي ف الشوط الأول، وگال إن السبب يعود لاختيارات تقنية، وان اللاعب كان مضروب ومابغاش يغامر به، لكن عميد الرجاء ظهر بمستوى جيد بمجرد دخوله أرضية الميدان.
وأكد المدرب الفرنسي أن الرجاء كان كيستحق الفوز ف الديربي، مشيرا إلى أن فريقه ارتكب خطأ تلقى أثره هدفا ضد مجرى اللعب، واضاف “سيطرنا في الشوط الثاني خلقنا فرصا كثيرة ولكن ما مركيناش، وكينتظرنا ماتش ديال “الروتور” وغادي نحاولو نربحوه، باش ندوزو ل “الدوزيام تور” في عاد المسابقة العربية”.