اوشن باغي 60 مدرب مغربي يخدموا معاه وجوج من برا… وها الشروط اللي بغا

روبيرت أوشن، المدير التقني للجامعة الملكية المغربية لكرة القدم، باغي 60 مدرب مغربي يخدم معاه في الإدارة التقنية.
الويلزي روبيرت اوشن أكد ف الندوة الصحافية الأخيرة، أن هناك مناصب شاغرة، ولكن خاص شروط ومعايير قبل ما يختار الأطر والمدربين، لي غادي يكون معاه.
هاد الويلزي ما كان عندو حتا حرج باش يعلن قدام الملأ، أنه ما عندو ما يدير بالفرنسي باتريس بوميل والمدرب الوطني جمال السلامي لحقاش ما لاقيينش بيه. باختصار المفيد باغي وجوه جديدة.
بوبيرت أوشن حدد شروط ومعايير لولوج الإدارة التقنية، منها أن يكون المدرب المرشح حاصل على دبلوم “ويفا برو” أو “كاف برو” أو حتا دبلوم A أو B، خاص غير يكون عندو تجربة في ميدان التدريب أو التكوين.
بزاف ديال المدربين حطو سيفياتهم هاذي سيمانة، وكيستناو يدوزو اونتروتيان قبل ما يتختاروا.
المدربون، لي غادي يلتحقوا بالإدارة التقنية غادي يختار منهم روبيرت أوشن مدربين للمنتخبات الوطنية، فيهم لي غادي يكونوا مؤطرين في الإدارة التقنية ومدراء جهويين، وفيهم لي غادي يدرب المنتخبات ديال الأولمبي اقل من 23 عام والشباب أقل من 20 عام والفتيان أقل من 17 والصغار أقل من 15، إضافة إلى المساعدين ديالهم.
وما شي بعيد يجيب المدير التقني جوج مدربين أجانب يقدروا يكونوا فرانساويين.