سكوب. بنعطية علق الصباط مع المنتخب.. الكابيتان ماحملش حجي يبقا.. الاحمدي باغي يخلي بلاصتو للعاب صغير و50 واحد فلاليست

المهدي بنعطية، عميد المنتخب الوطني قرر يعلق الصباط مع المنتخب، وما يرجعش ليه مرة أخرى، واخا عيط عليه المدرب وحيد خاليلوزيتش هاد المرة.
بنعطية ما بغاش يجي يلعب الماتشات ديال ليبيا والغابون فأكتوبر، لحقاش باغي يعتزل يلعب مع المنتخب.
مصدر من الجامعة، أكد بلي بنعطية ما بغاش يجي واخا برا من الضربة لي كانت عندو وارجع كيلعب مع الدحيل القطري، باغي يعتزل اللعب مع الأسود.
هاد اللعاب كانت عندو علاقة مزيانة مع المدرب السابق هيرفي رونار، وربما ما بغاش يلعب تحت قيادة مدرب 0خر.
لكن مصادر أخرى، أكدت أن عميد المنتخب الوطني ما حملش يبقا مصطفى حجي فالطاقم التقني ديال أسود الأطلس، خصوصا أنه سبق ليه تصادع معاه بزاف ديال المرات في روسيا ومصر.
الجامعة اتصلت بنعطية باش تخبرو، بلي سميتو رآها كاينة وخاصو يلبي الدعوة، لكنه رفض وتسبت بالاعتزال، حسب مصدر قريب منو.
الجامعة اتصلت كذلك بكريم الأحمدي، المحترف باتحاد جدة السعودي، وبغاتو يكون فالماتشات ديال ليبيا والغابون، لكن حتا هو اعتذر لحقاش باغي يخلي بلاصتو لواحد صغير، ومابقاش قادر يعطي كل ما عندو. على الاقل الاحمدي گال كلام معقول.
المدرب وحيد خاليلوزيتش مازال باغي يجرب لعابة اخرين، قبل ما يحدد لائحة ديالو، بعدما وضع لائحة موسعة فيها 50 لعاب، فيهم لي لعبوا الماتشات الأخيرة أمام بوركينافاسو وفيهم وحدين جداد.
الماتشات ديال ليبيا والغابون غادي يكونو هما اللخرين قبل ما يلعب خاليلوزيتش أول ماتش رسمي ليه مع المنتخب المغربي في نونبر المقبل، فاش غادي يلعب كونتر موريتانيا في التصفيات الإفريقية المؤهلة إلى كأس إفريقيا بالكاميرون 2021.