قناة Mbc 5 بادية سخونة. عرضات فيلم ديال لطيفة احرار فيه ايحاءات جنسية.. والمكلخين حاقدين.. يتفرجو بالتخبية ويستنكرو فمواقع التواصل

هادي يوماين بدات mbc 5 برامجها في المغرب العربي، و دغيا وبدات حملة كبيرة في الانترنت من اجل المقاطعة، وهادشي بسبب فيلم “حياة” لي رابح عدة جوائز عالميا، ولي دوزو فيه لقطة كتبان فيها لطيفة أحرار في طواليط مع أسامة البسطاوي. بعض رواد الانترنت اللي مازال عايشين فالقرون الوسطى، اعتابرو هاد اللقطات غير عائلية وماخاصش دوز.
واخا عارفين ان المشروع كامل مبني على حاجة وحدة وهي فلوس البترول، والتقديم والبرامج مقتول، وديما ف”كود” كناكدو انهم داخلين بالفن باش ينشرو الجهل، الا ان هاد المرة جا الجهل من عند المتفرجين بحملة “شوهتنا وحدة”. اه شوهتنا وحدة ولكن شوهة الكلاخ والتزمت ماشي العكس. كيتفرجو فهادشي بالتخبية ويغوتو ويستنكروه فمواقع التواصل.