دابا أنا عنصري ضد النوع البشري بأكمله وخصوصا بني جلدتي، عارف هادشي، وكنحتقر شعيبة وتفكيرهم الدنيء والمنحط وكل من يواليهم من محدثي النعمة لي كيسميوهم ظلما الطبقة المتوسطة، واخا، ولكن راه نقدر نكون رأي موضوعي على اللي كيوقع في اليوتوب المغربي. دابا المشكلة ماشي هي انحطاط المواضيع والتفاهة وداك الهضرة الغبية ديال الارتقاء. لا انا واقعي وكنتوقع من لمغاربة دائما ما هو اسوء ولحد الآن وبمقارنة مع شعوب اخرى حنا محظوظين ممخلصينش ثمن باهض لتفاهتنا، المشكلة أن التفاهة عندها قواعدها، راها حتى هي فن وحرفة. ميمكنش أم سامي ساكنة في سكن اجتماعي وربة بيت بشعة وموسخة وعندها مليون متتبع وكيتفرجو في فيديواتها من متين ألف لخمسيمة ألف، كل مرة كتوريهم كيفاش كتسيق دارها وكتنشر حوايجها وكتطيب برمة ديال لوبيا!!!! وبعض المرات كتدير مقلب فراجلها كتقوليه غنعوم بدوبييس في البحر وكتصور ردة فعله !!! وهو البحر غينشف اذا هبطات بدو بييس وراجلها زعما معصب وغيور على جسمها لي غتفتن بيه ولاد سبيطة… ديرها شي ممثلة شي مغنية شي مذيعة شي قرطاسة عندها شي زين ولا جسم خيالي نقدر نفهم، ولكن مليون واحد كلهم كيشبهو لأم سامي لي كيدير نفس لخرا لي كيديرو علاش متبعينها؟ نقدر نفهم أن كيم كرداشيان حزقات ثنائي اكسيد الفوسفور من بعد ما كلات كراطان ديال الدنجال لأول مرة حدث كوني مهم ولكن أم سامي وأم رايان شنو يقدر يخليك تتفرج فيهم؟؟؟ واخا تخترع رقصة كيكي وهي ساكنة في الضحى وحازمة راسها بزيف حياتي هادشي كيقصيها تلقائيا من عالم التفاهة اللذيذ والمسكر. دابا بصح أش هاد لخرا؟؟ حيدتو لينا الشيخات وجبتو لينا أم رايان؟ التفاهة مرحبا ولكن الخراء بلاش… وبالمناسبة أنا كنيتي رِيَّان بكسر الراء وتشديد الياء ماشي رايان…
