نايضة حشيان الهضرة وضريب المعاني بين “بلوگوزات” في انستگرام.. المخيرة فيهم عايشة فابور وزايدينها بحلان الفم

عالم الأنتسگرام عالم غريب وعجيب وفشي شكل.
هاد الأيام نايضة حشيان هضرة وضريب المعاني بين هادوك لي كيعتابرو راسهم مشهورات وعندهم عدد كبير من المتتبعين.
لي واقع، أن هدى الحياني طلات في برنامج “بيناتنا” على ميدي آن، وقالت أن معظم المعروفات كيعيشو فابور وكيمشيو يفرضو راسهم في أحسن الفنادق المصنفة في المغرب، وبعد المرات حتى خارجه، وكيرفضو يخلصو.
الهضرة ديال هدى كانت نيشان وقاصحة ومعحباتش بزاف من صحاباتها، لسبب بسيط أنها هي واحدة منهم، ونهار وماطال وهي كتدور في الفنادق، وملي كتمشي تصور شي لعيبة كتشد فلوس.
مصدر مقرب من هدى قال ل”كود” أنها مكتدوزش ستوري فابور، وكتشد القليلة 6 آلاف درهم. عاد الكادوات والسهرات وزيد وزيد.