فضيحة ساوثتبريدج مزال تابعة الوزيرة لمياء بوطالب: شركة طالباتها بتعويض 5 مليون درهم

قال موقع مغرب كونفيدنسييل ان شركة “مجموعة بوسطون للاستشارات” طالبات بخمسة مليون درهم للوزيرة لمياء بوطالب ف اطار قضية” ساوثبريدج” وحسب مصادر الموقع فان الشركة صيفطات للوزارة رسالة كتطالب بخمسة ملايين درهم تعويض اي مجموع المبلغ تقريبا اللي جا ف الكونترا اللي تلغات و تعطات لشركة اخرى ديال ساوثبريدج بعد تفجر الفضيحة.
للتذكير بعد أربعة أشهر عن تعينها ككاتبة دولة ف السياحة، ناضت الفضيحة ملي تعرف بلي الوزيرة منحت لشركة سوثبريدج عقد بقيمة 13 مليون درهم من دون إحترام قواعد ومبادئ الالتزامات المحددة قانونياً بخصوص مسطرة مراقبة صفقات الدولة وهاد الشركة ظهر انها ديال حسن بلخياط ، اللي عندو علاقة عائلية ب الوزير السابق بلخياط ،اللي هو عضو ف حزب التجمع الوطني للاحرار وهي شركة جديدة بحال الا اسسها غير من اجل ربح الصفقة ديال انجاز دراسة على قطاع السياحة.
الوزيرة ضرباتها ديك الساعة بنكرة وقالت انها ماوقعاتش تاشي عقد ولكن بان العكس من بعد بالدلائل منها رسالة الكترونية اما العثماني فقال انه ماعطاش موافقتو على اي حاجة.