خاص يحيدو ليه تا لمغربية. مغربي طلب الجنسية الاسبانية ومابغاش يعطيوها ليه حقاش ماعرف يجاوب حتى على سؤال

الصحافة الاسبانية ضحكات مزيان على مغربي عايش هادي عشر سنين فألميريا، وماش طلب الجنسية ودار فضيحة نهار دارو معاه اللقاء لي غايحدد واش غايعطيوه الجنسية.
المغربي مشا ماعارف والو رغم أن الجنسية يقدرو يسولوك فيها على تاريخ إسبانيا وثقافتها وسياسة الدولة وبزاف دالامور باش يقدرو يعتابروك واحد منهم.
هاد المهاجر سولوه شكون هي رئيسة حكومة جهة الاندلس لي عندها حكم ذاتي، ماعرفش، زادو سولوه إسبانيا واش دولة علمانية ماعرفش، زادو معاه وسولوه أشمن سن كتسمح إسبانيا لمواطنيها باش يصوتو ماعرفش، صبرو عليه أكثر وسولوه أش هو معنى الطلاق ماعرفش، سولوه على النظام السياسي ماعرفش، سولوه على الدستور الاسباني وآش هي قيمتو ماقشع تا وزة، وفالتالي طلع عندو مشكل ففهم حتى اللغة الاسبانية بشكل سليم.
ماقدوش هادشي مشى دعى المدير العام ديال السجلات والتوثيق حقاش مابغاش يعطيه الجنسية، قالت ليه المحكمة لبارح الاثنين، وسير فحالك راه عندو الحق مايعطيكش الجنسية راه نتا ماعارف والو علينا وباغي تكون إسباني.