حرب الطرق. تقلب تراكتور وماتو جوج ديال الشبان فنواحي قلعة السراغنة

ماتو جوج ديال الناس فحادثة سير خايبة بزاف بجماعة “الهيادنة” ، بعدما تقلب بيهم تراكتور وعربة مجرورة “شاريو”، كان هاز 13 شخص راجعين بعد يوم عمل فحقول الكمون بالمنطقة، فالطريق الثانوية الرابطة بين قلعة السراغنة وبن جرير.
الحادث عرف مصرع السائق لي فعمرو 24 عام وشخص أخر كان راكب حداه وفعمرو 23 عام وكينحادرو من دوار “أولاد الكرن” بجماعة أولاد “زراد” وتصاب راكب ثالث بجروح خفيفة.
وفور علمهم بالحادث الشنيع، جاو السلطات المحلية ورجال الدرك الملكي ورجال الوقاية المدنية، باش يعاينو الواقعة فعين المكان وتم نقل المصابين نحو مستشفى “السلامة” بقلعة السراغنة، لتلقي الإسعافات والعلاجات الضرورية، فيما تم نقل جثتي الضحيتين على متن سيارة إسعاف لمستودع الأموات بتعليمات من النيابة العامة المختصة.