الضجة لي وقعات مؤخرا على برنامج ” بغيت نتزوج ” لي دارتو نيستلي عرات على الترمة ديال الماركوتينغ فالمغرب و الناس لي خدامين فيه ! اغلب لي خدامين فالماركوتينغ كاتلقا اغلبهم مديكونيكطي على الشعب، مديكونيكطي على المستجدات و التغييرات لي كاتوقع فالمجتمع المغربي، اغلبهم من ليكول دو كوميغس للونطغوبغيز ! ديريكت ! كايضحكو بيناتهم و كاياكلو بيناتهم و كايعيشو بيناتهم حتى النكت الحامضة ديالهم كايفهموها غا هوما و كايضحكو عليها غا هوما ! و كاين فيهم لي ماكايفهمش تا الدارجة و ماكايهضرش بيها باش بغيتيه ينظر ليك للاشهار و للماركوتينغ فالمغرب ؟! وي كاينين الدراري و البنات لي خدامين فالماركوتينغ و قافزين و ولاد الوقت تبارك الله عليهم تحطهم على الجرح يبرا و لكن الاغلبية مديكونيكطيين على الواقع. باش تكون خدام فالماركوتينغ و كاتجيري برودوي قدو قداش ديال ماركة قدها قداش ! ديستيني لواحد الشريحة واسعة ديال المغاربة ! راه خاصك تكون فايت ليك وقفتي كليتي صواصيصو ديال الكلب عند شي مول الكروسة فالبرنوصي و فايت طلعتي فالطوبيس و عفطو ليك على السباط و كمشو ليك القاميجة و فايت ليك صبات عليك الشتا و فزگو ليك التقاشر بالما … و عايش و حاس بشنو كايعيش داك المواطن المغربي ! خاصك تكون مآبوني ففايسبوك لموحماد مول الحانوت و سقراط و الشيخ أبو الحسن الكتاني و أنا شخشيا بجلالة قدري و سكيزوفرين باش تعرف مختلف العقليات لي كاتأثث المجتمع المغربي ! خاصك بعدا اولا و قبل كل شيء ! تكون كاتقرا گود ! حيت باش تكون خدام فالماركوتينغ فالمغرب و ماكاتقراش اشهر و انجح و احسن جريدة الكترونية كاتكتب بالدارجة راك مديكونيكطي آ حنيني على الطيرموميطر ديال العقليات فالمغرب ! ايه طبعا ماكانگوليكش بقا تاكل غير فالكرارس ! سير مع راساتك للكابيسطون و قصر مع راساتك فميزون بي ! و شوف المغرب ديال ميزون بي ! و لكن ماتسدش على راسك فيه ! حيت الجزء الاكبر ديال المغاربة كايعيشو فميزو ” خي ” ! هاد التجربة الفاشلة ديال نيستلي فالمغرب ! الصراحة عرات على سوءة الناس لي خدامين فالماركوتينغ و بيناتهم بواحد الصورة خايبة بزاف ! راه مصيبة لاكان هاد الكونسيبت شافو الديريكتور ماركوتينغ ديال نيستلي و فاليداه ! و شافو البراند مانادجر و فاليداه و شافو الآسيستنت براند مانادجر و فاليداه ! و راه مصيبة اكثر لا كان هاد الكونسيبت درتوه بلا ماديرو ليه بري تيست ! و مصيبة اكبر لاكنتو درتو البري تيست و ماخرجش ليكم بلي هاد الكونسيبت ماكونسيبت ماتاخرية ! غا سيرو دعيو لاجونص لي دارت ليكم هاد الخسلة ! و غا جريو على راسكم من دوك البوسطات لاكنتو ماقادينش تنتجو افكار و اشهارات و كونسيبتات كاتراعي للتغيرات ديال المجتمع. انا شخشيا كون كنت فبلاصة شي مسؤول من نيستلي كون حيدت ليكم البريمات هاد العام و العام الجاي و العام لي موراه ! حيت ماشي معقول تجيو تآسوسيو ! تربطو اسم شركة كبيرة بحال نيستلي و ليماج ديالها بكونسيبت مقودة عليه تال هاد الدرجة و تبينو الشركة كراعية للتخلف و الجهل و تحقير المرأة. لعيب ماشي فنيستلي ! العيب فيكم ! فيكم نتوما لي فكرتو فهاد الاشهار و قاليكم الطانطو ديال مخكم آجي نديروه راه غايتمشى ! و مافكرتوش بلي هادشي واخا كاين فالمجتمع المغربي راه الناس مايقبلوهش ليكم ! ماغايفرحوش بيه ! وي هادشي لي قلتو كاين! كاينين العيالات لي كايضاربو باش يتجوجو و يضبرو على بوركابي ! كاينين العگوزات المسمومات ! كاينين الرجال لي كايختارو ليهم ماواتهم العرايسات ! كاين هادشي كلو و كاين ماكفس منو گاع و لكن باش تجيو و تحطوه كي الخرية و تعلمو عليها سمحو ليا بالزربة راه قمة الكالاخ هادي ! حيت واخا هادشي كاين و لكن راه جزء مهم من المجتمع كايرفضو … هاد الكونسيبت كون درتوه فالخمسينات و الستينات كان يصدق و يحقق البوز ! و لكن دابا فالفين و تمنطاش لا ! باد بوز ليكم حيت ثم نيستلي زعما شركة كبيرة اولا ؟ ياك عندكم داكشي ديال ال RSE و empowering women … و و و …. مافكرتوش فأنكم بفحال هاد الاشهار كاتعاونو الجهل و الافكار الخرائية فالانتشار و كاتزيدو تكرسو صورة المرأة النمطية لي همها هوا الجواج و الراجل لاكانت مازالة عزبة و شابة ! و مسمومة و گارحة لاكانت عگوزة عندها ولد باغا تجوجو ! صافي ؟ غاهادشي لي بان ليكم تصوروه و تحطوه ليا كي الخرية ؟ هوا انا نقدر نفهم انه نستلي ماشي الدور ديالها هوا تنشر الوعي و تحسن من وضعية المرأة و تحارب الكليشيهات الموسخة ! و يكون همها الوحيد و الاوحد هوا الگرمومة و ليفونط و الشيفغ دافيغ و ليباغ دو ماغشي ! معلوم و من حقها ! و لكن راكم بفحال هاد الاشهارات شوهتو بيها و خلقو ليها مشكل صورة ! ليماج دوماغك ديال نيسلتي شرشمتو باباها! و هادشي كامل كايبين بلي مشكلة الماركوتينغ فالمغرب ! مشكلة كفاءات ! جريئة و شجاعة و تكون عارفة المجتمع مزياااان و واعية بالتغيرات لي فيه و باغا تم و تبدل مجهود و عندها لاكرياتيفيطي ! داكشي علاش عندنا الاشهارات كايتشابهو كلهم فيهم الدقايقية و زطق زطق زطق ! حيت كلشي عارف المغاربة كايموتو على الدقايقية و كلشي كايلتاجأ للدقايقية حيت تاواحد ماباغي يهرس راسو و يخمم و ينتج فكرة كلشي كايقلب على لافاسيليتي ! عوض مايفكرو فاشهارات واعرة و ذكية !
