سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
زيان كاع ما مسوق لهاديك القضية ديالو: عايش الحياة ديال المرضيين عند الله. قال علي قضية بوعشرين: ما عمرني فحياتي المهنية شفت قضية الجنس تحال مباشرة للجلسة بدون بحث
محمد زيان المحامي والحقوقي صانع الحدث هاد الايام. طريقة دفاعو على موكليه سواء الزفزافي سابقا او الصحافي توفيق بوعشرين حاليا ثم قرار متابعته وباغيين كاع يشطبو عليه خلاتو يكون تحت الاضواء. زيان اللي ديما كيقدم راسو جزء من هاد النظام ماشي معارض ضدو كيف كيقولو محاميين اخرين كيضرهم اكثر. سبق دافع على الدولة فملفات كبيرة وسبق عارضها من الداخل فحملة التطهير. عندو جرأة. عندو استقلالية. عارف اش كيدير. زيان عندو قضية يوم 23 مارس. باغيين يشطبو عليه من المحاماة بتهمة التبليغ على جريمة يعلم عدم حدوثها فقضية الزفزافي ودور الياس العماري الامين العام للاصالة والمعاصرة في احداث الريف وما قاله من اتصالات متكررة مع قائد الحراك. بالنسبة لهاد القضية زيان واثق من راسو. اتصلت به “كود” وسألته “كيف داير المورال”؟ رد باللي بيخير. ثم اضاف بسخريته المعهودة “الناس اللي معاهم دابا كيبشروني باللي داخل للجنة”. وزاد فسخريتو القاصحة موجها اياها لخصومه “عايش الحياة ديال المرضيين”. زيان موجد كذلك لقضية بوعشرين الاسبوع الجاي. قال ل”كود” “ما عمرني شفت قضية تتعلق بالجنس تحال للجلسة بدون بحث. ما عمرني فحياتي المهنية ما شفت هاد الشي”. طبعا كاين شكوك من دفاع بوعشرين بخصوص المشتكيات. حقاش ضحايا اللي كيتهمو بوعشرين كاينات مصرحات فقط وكاينات شي وحدات جابوهم يصرحو بعد ما شافوهم ففيديو قالو لقاوه فمكتب بوعشرين ولاو مشتكيات. هنا القضية كتخلي الدفاع كيشك والنيابة العامة كتصر. فهاد الفيلم لاعب زيان ماتش اخر. عارف مع من لاعب وعندو احساس كيفاش غادي يسالي الماتش ولكن مقاتل٬ وكاي مقاتل كيوظف تكتيكات لحد الان شادة ليه.
