لعرايشي مؤزم: والسيد قدم من العهد الجديد وكاليك فحالة نفسية فشي شكل بعد ما خرج خبار قرب الاستغناء عليه من التلفزيون والاذاعة

فيصل لعرايشي الرئيس المدير العام للشركة الوطنية للاذاعة والتلفزيون اللي فبلاصتو شي 17 عام تقريبا بلا ما يتغير كاليك كيعيش حالة نفسية فشي شكل ومؤزم وما بقاش يجاوب على تلفونو حقاش خرج خبار قرب الاستغناء عليه بالاضافة الى مسؤولين اخرين ف"دوزيم" و"ميدي 1″ و"ميدي 1 تي في" ويمكن حتى "لاماب" =وكالة المغرب العربي للانباء.
سميرة سيطايل دارت تدوينة على الفايسبوك تتهكم على الخبر. وشفتو على بلاد عوجا حنا فيها. مسؤولين من العصر الحجري وهما فمناصبهم وباش كيخرج شي خبار عن قرب تغييرهم شي يتأزم وشي يتقلق وشي يتهكم.
هاد المناصب مع كلشي اللي عرفو المغرب وبان حدود تأثيرهم خاصهم تغيير خاص ناس جداد قافزين فيديهم