— بزاف ديال الفيديوات ديال البوليس كيشدو شي شفار أو خلية ارهابية أو آخرهم داك الرضيع ديال مراكش لي سرقو طبيب ، كيبانو فيهم مواطنين مغاربة فرحانين بتدخل الأمن والعيالات كيغوتوا عاش الملك عاش الأمن ، وكيخرجو المتهم بالجاه العالي ، وكتبانليك الفرحة على وجوه المواطنين إلا ففيديوات تحرير الملك العمومي ، كيبانليك بنادم دايز ممسوقش أو مجوق وفنفس الوقت غير مبالي ، وكاين كاع لي كيعتابر الأمر تعدو على مول المحال ، وكاين لي كيتعاطف معاه ، حتى فالتعاويد ديالهم كتلقاه مأسف لمول لقهوة ، " تعداو عليه مسكين خاسر عليها 120 مليون مشات غير هاكاك "، وقليل فين كنسمعو شي وقفة من أجل تحرير الملك العمومي ، حتى الى كانت فراه فالغالب غير على ود الفراشة والخضارة ، أما موالين القهاوي الفاخرة فين كيريحو رجال السلطة نيت عمرك تشوف شي وقفة ضدهم مثلا . المغاربة عندهم موشكيل مع الملك العمومي تقريبا مكيعتابروهش ديالهم بل ديال الدولة ، ولي حرر شي طرف منو فبصحتو وسعداتو ، يقدرو يحسدوه حيث احتل الملك العام ، كثر من أنهم يعتابرو الأمر تعدي على حقوقهم كأفراد ، حيث حقوقهم أصلا مكيحسوش بيها عندهم أو عاطياهاليهم الدولة ، بل خدامين بلي خدا شي حاجة بصحتو ولو على حساب الخريين ، لدرجة أن المحالات لي قبالتهم طروطوار عريض كيتباعو بثمن كثر حيث كاين فين تدير لاطيراس وكاين ما تحتل ، وكيتعتابر الأمر من مميزات الماحال بحال الى الملك العام جزء منو . هاد اليوماين نايضة حملة ضد احتلال الملك العام فعدة مدن ، حيث الصراحة بالنسبة للراجلين راه مابقا فين يدوز بنادم على رجليه إلا وسط الشانطي ، وخصوصا صحاب الماكلة والقهاوي لي جزء كبير من مداخيلهم راه مبني على داك لاطيراس ، غير هو راه الأمر كيعنينا كمواطنين وهاد اللامبالاة لي عند المغاربة تجاه مثل هاد الحملة كتعني الكثير وراه مؤشر على تعامل المواطن مع الملك العام ونظرته للدولة ، حيث بالنسبة للبزاف الدولة واخدة كولشي بغير دي حق ، ومكتعطي والو ، والى قدرتي كمواطن تحيد منها شي حاجة فراك واعر ، والملك العام بالنسبة ليه ماشي ديال المغاربة وانما ديال الدولة فقط ، والدولة ماشي كجهاز مسير وإنما ككيان منفصل كيمثل السطوة والقوة والحكرة والقهرة ، راه قبل تحرير الملك العمومي خاص الدولة توعي المواطنين بأن الأمر كيخصهم كأفراد ، حيث لحد الآن بالنسبة للعديد تحرير الملك العمومي كيعني حيدوه للمواطنين وخداتو الدولة ماشي رداتو ليهم كجماعة .
