سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
اليوم مفهوم الوطنية تبدل عند المغاربة ! ماغاديش يتزاد الاحساس بالوطنية بقوة التصاور و الرايات و الاغاني الباهتة …بهاد الطريقة الدولة كادير لراسها ماركوتينغ فاشل!!
مزيان نديرو شوية د الماركوتينغ للدولة ! خصوصا انو جيل المسيرة نقارض او في طور الانقراض ! الناس لي عقلو عليها كوراهم ولاو فوسفاط دابا و هاد الاجيال الجديدة غي سامعين بيها! لي مامزيانش هي تولي الاحتفالات كاتشبه لبروباكاندا ديال الدول فحال الصين و كوريا الشمالية ! كثرة الرايات و التصاور و الاناشيد و الاغاني لي ماليها لا ساس و لا راس ! هادشي كان صالح شحال هادي يامات الحرب الباردة و فدول لي فيها le culte de la personnalité ! حنا دولة كاتحاول تعطي صورة على انها دولة ديموقراطية ! حداثية ! موديرن ! اذن حتى التعامل مع الاحتفالات الوطنية خاصو يكون كايراعي لهاد المسائل ! ماغاديش نوضو حنا فمغرب 2015 نحتافلو بالطريقة لي كان كايحتافل بيها موبوتو سيسي سيكو فالكونغو حاليا (جمهورية الزايير سابقا)! الهدف ماشي هو نبينو للناس أنو المغرب ولا هو ليبيا الجديدة ديال المنطقة ! لاش عرام ديال الرايات و الاغاني و البرامج كايتعاودو على الاذاعات الوطنية بكلمات مرتجلة ! اشعار باهتة ! و فيديو كليبات عيانة ! راه اليوم مفهوم الوطنية تبدل عند الناس ! المغربي ديال 2015 ماشي هو المغربي ديال 1975 ! العقليات تبدلات، شحال هادي كان بنادم عندو ديك العقلية " القبلية " ديال الانتماء للأرض و الهوية و القبيلة …زمان كان ممكن نأثرو فالناس بالأغاني الحماسية و البروباكاندا ! و دوك الفيديوات لي مصورين بالهيليكوبتر ديال المطارات و السدود و الموانئ و الطرق … يمكن شحال هادي كانت العملية كاتصدق فاش كان بنادم ماعندوش بارابول انترنيت كميوتر كانو الناس يمكن تمارس واحد النوع ديال l'endoctrinement على الشعب بخاطرك و بلا مايبرزطك شي حد ! اليوم صعيب بزاف حيت الناس ولاو كايديرو مقارنات ! حيت مفهوم الوطنية تبدل ! اليوم الناس كايسولو علاش و كيفاش ؟ علاش خاصني نحس بالانتماء ؟ شنو قدم ليا الوطن باش نقدم ليه حتى أنا ؟ راه تا علاقة الحب بين راجل و مرا و تبدلات اليوم ! الناس مابقاوش كايتيقو بداك الحب اللامشروط ! شحال هادي كانت المرا كايسلخها راجلها يجندخها يتجوج عليها كاتبقا لاصقة فيه تقولك يضربني و مايخلي لي يضربني ! اليوم تقدر دابز معاه على التيليكوموند تنوض طلقو !! نفس الشيء بالنسبة لعلاقة الحب بين المواطن و الوطن ! شحال هادي المغربي كان قابل على بلادو كيما هيا ! يدور يدور و يقولك " اودي المغرب زين" ! ولاد اليوم لا !مابقاش عندهم داك الحب اللامشروط ! تاهوما بغاو بلاد كاتحتارمهم ! بلاد تحترم الانسان و الحريات و الحقوق … الحب ديالهم ولا مشروط ! و الوطنية مشروطة و مرتبطة بشنو عطاتني البلاد باش نعطيها … donnant donnant ! ايه ! هادشي لي كاين ! الدليل أنو اليوم بزاف د الناس كايهاجرو ماشي بالضرورة باش يصورو طرف د الخبز !اكاين لي كايهاجر على ود طرف د الخبز و كاين لي كايهاجر باش يعيش فالنقا و الكرامة ! المهندسين و الدراري لي كايقراو برا و كايبقاو برا راه بأمكانهم يدخلو للبلاد و يخدمو ! طبعا غايلقاو خدمة فالبريفي و بصالير محترم ! و لكن كايبقاو برا حيت la qualité de vie جودة الحياه (الطرق السبيطارات القهاوي الريسطورات) احسن من المغرب و حيت بنادم يقدر يصبر و يعيش فستوديو ضويق فباريز على ود ديك الكرامة لي كايحس بيها و هو تما. اليوم البروباكاندا مابقاتش صالحة ! كثرة الدرابوات و الاغاني و التصاور و الغوات مابقاتش كاتعطي نتيجة ! و لا تأثير على العقليات … يمكن الدولة تستغنى على هادشي كامل و تشوف غيرو! حيت الاحساس بالفخر و الانتماء و الوطنية اليوم ماغاتحركوش فيك اغنية باهتة و لا شعار بارد ! الاحساس بالوطنية كايتبنى على حوايج ملموسة كايشوفها المواطن قدامو! فرقة د الكورة واعرة ! بلاد عندها صناعة قوية ! بلاد دخلات حرب و ربحاتها! فحال سقراط و صاحبتو … سقراط فخور بيها حيت الساطة عندها ! هازة و دماغ و فين ماجيتيها تلقاها … قلبا و قالبا ! عندو علاش يفتاخر بيها… تا المواطن هكاك ! باش يحس بالفخر خاص الدولة يكون عندها!
