حسبان داير مبغا في الرجا رشقات ليه غادي أجل الجمع العام عوتاني

قرر سعيد حسبان، رئيس الرجاء، مرة أخرى باش يأجل الجمع العام العادي لشي نهار آخر، من بعد ما كان ناوي اديرو في 19 فهاد الشهر.
حسبان مني فشلوا المنخرطين البارح باش احيدوه، زاد تقوى ولا كيحكم في الرجاء أكثر من السابق وباش ابين للرجاويين أنه هو لكيقرر، رشقات ليه هو يقرر تأجيل الجمع العام حتى اوجد التقارير على خاطرو ورسل الدعوات ديال الحضور للمنخرطين.
ورغم أن الجامعة كتفرض على الفرق أنها دير الجمع العام ديالها قبل 31 غشت، باش تعطيها المنحة، ولكن حسبان متسوقش للجامعة لأنه عارف أنه مغاديش اياخد المنحة من الجامعة، بسباب أنها كتعطيها للاعبين لعندهم مشاكل مع الرجاء.
والجمع العام ديال الرجاء لغادي اديرو حسبان غادي اتحول من جمع عام عادي إلى استثنائي باش اعاود اصوبو القوانين ودير ملائمة جديدة مع قانون الجمعيات الرياضية الجديد.
وسبق لحسبان أجل الجمع العام من غشت حتى لشتنبر، وعاود غادي أجلو حتى اوجد التقرير الأدبي والمالي ديالو وغادي ابقى الرجاء الفريق الوحيد لمدارش الجمع العام ديالو.
والبارح كان جمع عام استثنائي ديال المعارضين ديال حسبان ولكن فشلو في الإطاحة بيه، مقدروش اجمعو النصاب القانوني، ولغاو الجمع العام.